Mizoram sorkarin kawlphetha man 21.05%-a tihsan JERC-ah a rawt

Mizoram sorkar chuan Mizoram leh Manipur electric bill man tur bithliahtu, Joint Electricity Regulatory Commission for Mizoram and Manipur (JERC) hnenah kum 2022-23 atan kawlphetha hman man (power tariff) ennawn a, 21.05% a tihsan a rawt.

JERC hotute hnen aṭanga Vanglaini thu dawn danin, kum tin power tariff ennawn a ni ṭhin a, sorkarin tihsan a rawtna anga tihsan a ni kher lo. Sawiselna leh rawtna lut a awm a nih chuan, chu'ngte chu ngaihtuah chungin, mipui tana phurrit lutuk lo, sorkar tan pawh hek lutuk lohna tura ngaihin tariff bithliah a ni ṭhin. Kum tin ennawn a nih chhan chu, vawi leh khata bill a sân lutuk lohna turin a ni.

Tun ṭuma Mizoram sorkarin electric bill 21.05% a tihsan a rawt chungchangah hian sawiselna leh rawtna nei tan February 20, 2022 thleng JERC-ah ziaka thlen theih a ni. Sawiselna leh rawtna thlentute'n hmaichhanah an duh zawng an sawina hun (public hearing) buatsaih leh tur a ni a, chutah chuan Power & Electricty department-in an duh dante an sawi ve bawk ṭhin.

Mizoram sorkarin rawtna a siam anga power tariff tihsan a nih chuan, sorkarin a subsidise hnuah chawhrualin power unit khat man Rs. 8.80 a ni dawn a, tuna tariff hman mekah chuan power unit khat man Rs. 6.71 a ni.

Sorkar kum kal mek (2021-22) power tariff atan Mizoram sorkar chuan 41.92%-a tihsan a rawt a, mahse, JERC chuan Mizoram sorkar rawtna chu pawm loin, 20.68%-in a tisang ta zawk a ni.

Power & Electricity department chuan electric hman man, tariff thar tura rawt aṭanga sum hmuh belhin department-in revenue a hmuh tur zat a hmuh tlin loh ṭhinna a tihziaawm beisei a nih thu hriattirna an tih chhuahah an tarlang a, "Electric hman man tuna rawtna anga tihpun a nih chuan rate hman mek lai aiin cheng vbc. 75.83 hmuh belh tura chhût a ni," an ti.

Power & Electricity department tarlan danin, rawtna an siam angin electric bill tihsan ni mah se, sorkarin cheng vbc. 277.55 a ngaihtuahpui a la ngai dawn tho a ni.