SEDP-ah cheng sing 4/5 sem phawt tum Unit-in in thlan tur lo en rawh u - Zoramthanga

MNF president Zoramthanga, chief minister chuan, SEDP-ah Rs 40,000 - 50,000 vela an sem phawt tur thu a sawi a, MNF unit-te chu SEDP dawng tur an thlan turte lo en turin a chah.

Zoramthanga hian nimin kha Kolasib-ah MNF diamond jubilee lungphun leh Mizo Hnam Rûn a hawng a, chumi hnua Diakkawn YMA Hall-a jubilee lawmna inkhawmah thu sawiin, sorkar kum tharah SEDP an kalpui tawh dawn thu a sawi a, "Chhungkaw 50,000 - 60,000 chho cover vek kan tum. Vawi khatah a tampui Covid-19 avangin kan pe thei lo. Chhungkaw pakhat tan Rs 40,000/50,000 chu kan sem thei turah kan ngai. Kan trade thlan tur pawh keimahniin kan thiam a ni ang. Kan chhungkuain duh zawng trade-ah kal mai tur," a ti.

Unit tinte chu an thlan turte lo en tura chahin Zoramthanga chuan,"In vengah lo en ula, Congress, ZPM member leh party dang chu a hmasaah chuan in thlan ka ring lo," a ti a; mi hausa leh sorkar hnathawkte pawh thlan tur an nih loh thu a sawi.

Party dangte sawisel an ngai lo tih sawiin Zoramthanga chuan, "An dinhmun dik tak erawh hriat chian a ngai. Tun dinhmunah Congress leh ZPM an lian deuh niin a lang. Amah­erawhchu, Congress chu an tluchhe vek tawh a, MP (Lok Sabha) 500 chuang awmnaah 50 an nei hrâm a, sorkarna siam an hlat hle," a ti a, Congress chu er tham an awm lo niin a sawi.

ZPM chungchangah MNF Presi­dent chuan, "An inhâm puar thiam a, MNF ni lo, Congress ni lo tiin movement an ti a. Kan unit chu kohhran a ni mai tiin MLA pasarih an titling. Tunah erawh an nihna a lang ṭan a, mipuiin an hmu thiam ṭan. Kalphung thar pawh vawi sawm vel an nei tawh àwm e. Val Upa Council, working president leh leader an neih dante chu tui anga nghet lo an ni," a ti.