KHAWTHLIR

Thisen pe
Baptist Higher Secondary School NSS unit chuan nimin khan Christian Hospital, Serkawn tan thisen unit 32 an pe a, petute mipa 20 leh hmeichhia 12 an ni.

Online booking sût
Mizoram sorkarin online application hmanga sorkar pisa dawr turte inziah luh hmasak tur a nih thu January 12, 2022-a thupek a tihchhuah tawh chu nimin khan a sût. Sorkar pisa dawr turte chu Covid-19 laka himna tur inkaihhruaina ṭha taka zâwm tura chah an ni.

ATM booth hawng
Mizoram Cooperative Apex Bank-in Mamit Field Venga Mizo ṭawng hmang automated teller machine (ATM) booth an bun thar chu nimin khan Mamit bawrhsap Dr Lalrozama'n a hawng. MCAB hian Mizoramah branch 22 leh ATM booth 22 an nei mek a ni.

MZP-in MZU ngen
Mizoram University-a thawk tur laknaah ram leilung fate duhsak turin MZP Gen. Hqrs chuan nimin khan MZU vice chancellor Prof. KRS Sambasiva Rao an ngen. MZP hian MZU-a hna hrang hrang thawk tur lâknaah thiamna inang leh thawk tura tling zingah ram leilung fa Mizote duhsak turin an ngen a; an ngenna hi lehkhain an thehlut a ni.

Minister-in enfiah
Sports & Youth Services minister Robert Romawia Royte chuan nimin khan Dawrpui Venga Multi Car Parking-Cum-Basketball Court sak lai a tlawh a, hna thawktute chu chak taka thawk turin a chah. Project atan hian cheng nuai 529 ruahman a ni a, PWD leh contractor-te chuan April 2022-a thawh zawh hman an tum thu an sawi.

Vawk lak luh khap
Khawzawl bawrhsap CC Lalchhuangkima chuan, vawk hri African Swine Fever (ASF) laka him nan Khawzawl district páwn aṭanga vawk lak luh a khap a, vawk talh chungchanga hriat turte a tichhuak bawk. Khapna thupek hi thla hnih chhung hman tur a ni a, thupek zâwm lote chu IPC Section 188 hmanga hrem theih an ni.