Sihhmuiin an khua pan rih lo turin Myanmar ráltlânte an ngen

Raltlan Relief Committee, Sihhmui chuan thuchhuah siamin, an khuaah Myanmar aṭanga ráltlân ṭhahnem tak an awm mek thu an tarlang a; hmunhma an neih tawh rih loh avangin ráltlânte chu an khua pan tawh rih lo turin an ngen.

Sihhmui Raltlan Relief Committee tarlan danin, an khuaah March 2021 aṭangin ráltlân an lut ṭan a, tun dinhmunah camp-ah mi 233 leh khaw chhungah mi in luah 204 an awm a, an vaiin mi 437 an awm mek. Sorkar bakah, pawl, kohhran leh mimal hnen aṭangin pawisa, mutbu, thawmhnaw leh ei leh in turte an dawng a, chungte chuan eng emaw chen a chhâwk zângkhai a, an harsatna a sutkian phah nasa hle a ni.

Tun dinhmunah refugee camp a khat tawh hle tih tarlangin Sihhmui Raltlan Relief Committee chuan, "Hetiang hi kan dinhmun a nih avangin Sihhmui pan tum ráltlân an awm a nih chuan camp siam belh a nih hma chuan rawn pan rih lo turin kan ngen a ni," an ti.