January 27-a Covid-19 positivity rate 27.32%

January 27, Ningani khan Mizoramah Covid-19 vei mi 2,064 hmuh chhuah a ni a, positivity rate 27.32% a ni. January thla chhungin positive 26,061 hmuh a ni tawh. Nimin khan hripui vei dam tawh mi 1,250 chhuahtir an ni a, Covid-19 vangin mi pahnih an thi.

Covid-19 vei Ningania hmuh tharte chu mipa 883 leh hmeichhia 1,181 an ni a, RT-PCR hmanga hmuh 379, TrueNAT hmanga hmuh 33, RAT hmanga hmuh 1,624 leh FIA hmanga hmuh 28 an ni. Mi 2,064 zinga mi 1,246-in symptom an neih laiin, mi 818-in an nei lo.

IPR tarlan danin, Lengpui Airport-ah RAT hmangin state páwn aṭanga rawn lut zinga mi pakua Covid-19 positive 30 hmuh chhuah a ni a, screening point dang - Kanhmunah mi 21 leh Tuivaiah mi pali hmuh a ni bawk.

Sample endikna district 11 zingah positivity rate 10% aia a sànna district pariat awmin, a sànna ber Aizawl district-ah 39.39% a tling a, ni li chhung a zawnin positivity rate sanna ber a ni tawh. Siaha, Lawngtlai leh Khawzawl district-ah 10% a tling lo.

Nimin tlai dar 5 thleng khan hripui vei dam tawh mi 1,250 chhuahtir an ni a; district tina chhuak zat chu - Aizawlah 743, Khawzawlah 143, Mamitah 97, Lungleiah 63, Serchhipah 57, Kolasib-ah 45, Champhaiah 34, Saitualah 34, Hnahthialah 15, Lawngtlaiah 11 leh Siahaah pariat an ni.

IDSP record angin, Mizoramah Covid-19 vei 1,67,725 hmuh chhuah a ni tawh a, mipa 79,745 leh hmeichhia 87,980 an ni a, mipa aiin hmeichhia 8,235-in an tam zawk. Nimin tlai dar 5 thleng khan mi 1,54,663 (92.21%) chhuahtir an ni tawh a, mi 593 (0.35%) thi tawhin, enkawl mek mi 12,469 (7.44%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 1,67,725 chu mi 1,000 zelah hripui vei mi 151 an awm ang a ni a; mi 1,00,000 zela Covid-19 vangin mi 53 an thi tawh ang a ni tih sorkar thuchhuakin a tarlang.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. January 27, 2021 thlenga swab sample endik tawh 16,50,852 aṭanga RT-PCR hmanga endik zat percentage chu 20.69 a ni a, RAT hmanga endik zat chu 73.55% a tling.