Kum 60 chung lam hripui vanga thi zingah vaccine la lo an tam

Health & Family Welfare minister Dr R Lalthangliana hoin nimin khan district bawrhsapte leh chief medical officer-te'n Covid-19 dinhmun an sawiho. Minister chuan, kum 60 chung lam hripui vanga thi zingah Covid vaccine la lo an tam thu a sawi.

Dr R Lalthangliana chuan, nimin chhun thlenga Covid-19 vanga thi chu mi 593 an nih thu sawiin, "Mipa 376 leh hmeichhia 217 an ni a, nikum lamah Aizawl khawpuia cheng an tam. Hripuiin thingtlang lam a luhchilh hnu hian thingtlang lamah nunna chán an pung nasa hle. Kum 60 chung lam thi zingah vaccine la lo an tam hi a pawi tak zet a, vaccine lakah ṭan lâk a ngai," a ti a; kum 2022 bikah nimin thlengin hripui vanga thi 42 an awm tawh thu leh chu'ng zinga 35 chu Aizawl páwn lama mite an nih thu a sawi.

Kum 2021 tàwp lam khan Covid-19 ah Mizoram dinhmun a ziaawm viau hman tih sawiin R Lalthangliana chuan, "Tun hnaiah hri vei kan pung nasa leh ta hle hi a lungchhiatthlak a, puh tur zawn duh chuan a awm ṭeuh thei ang. Chu lam chu kan ngaihtuah hman tawh lo a, inkài chhàwnna dan chah leh hri veite enkawl dam thuai hi kan ngaih pawimawh ber a ṭul," a ti.

Health Minister chuan, Aizawl khawpui leh district khawpuite chu a hma chuan hri vei tam ṭhinna a nih thu te, tunah chuan thingtlang kilkhâwr ber bera ngaihah pawh a khawnâwta hri vei an pun thu te, kuminah Lengpui Airport-ah khualzin rawn lut mi 600 vel Covid-19 positive hmuh a nih tawh thute a sawi.

CCC leh DCHC awm sate a khah chak avangin CCC siam belh a ngaih leh tawh thu te, hriatthiam awlsam zawka hri vei enkawl dan zirtir uar a ṭul te, symptom nei lo tan home isolation-a awm a ṭhat tâwk thute a sawi bawk.

Ṭhutkhawmah hian district hrang hrang dinhmun leh hmalaknate tarlan a ni a; chhuanlam hrang hrang neia Covid vaccine la duh lo an la awm avangin hmalak dan turte an sawiho a ni.