Lawmman dawn loh vangin ASHA-te an chawl rih dawn

Accredited Social Health Activist (ASHA) volunteer-te chuan hun rei tak chhung an thawh lawmman (incentive) an dawn tawh loh avanga lungawi lohna lantir nan February 1, 2022 aṭangin hna an chawlhsan rih dawn.

All Mizoram ASHA chuan thuchhuah siamin, Mizorama ASHA volunteer 1,091-te'n National Health Mission (NHM) hnuaia scheme hrang hranga hna an thawhnaah hun rei tak chhung lawmman an dawng tawh lo tih an tarlang a, "Hun rei tak lawmman kan dawn tawh loh avangin February 1, Thawhlehni aṭang hian lungawi lohna lantir nan hna kan chawlhsan rih dawn a ni," an ti.

ASHA volunteer-te chuan hna an chawlhsan rih dawn avangin Mizoram khua leh veng hrang hranga ASHA hmang ṭangkai ṭhintu mipui hriatthiamna an ngen a; an thawh lawmman an la dawn kim lohte a rang lama pe turin Mizoram sorkar an ngen bawk.