Covid-19 vei mi 24 hmuh thar a ni Positive 186 zinga 139-in an vei tawh lo

June 4, Inrinni khan Mizoramah Covid-19 hripui vei mi 24 hmuh chhuah thar a ni a, heti hian Mizoramah hripui vei hmuh chhuah zat chu mi 186 an ni. Hetih lai hian, Inrinni leh nimin khan Covid-19 vei dam tawh mi paruk chhuahtir an ni. Hripui vei zinga mi 139 chu an fihlim (negative) tawh a, chu'ng zinga mi 133 chu chhuahtir an ni tawh.

Sorkar thuchhuah tarlan danin, June 4 khan Lunglei Civil Hospital laboratory-ah TrueNAT khawl hmanga mi pasarihte swab sample endik zingah mi pahnihte'n Covid-19 an vei tih hmuh a ni a, mi panga an fihlîm. Hripui vei hmuh tharte hi BSF sipai ve ve, state páwn aṭanga rawn lêt an ni. Lungleia TrueNAT khawlah RdRp gene confirmatory assay a awm tawh avangin ICMR guidelines angin, Covid-19 vei a hmuhte chu finfiah turin ZMC laboratory-ah thawn a ngai tawh lo.

Zoram Medical College (ZMC) laboratory-ah July 4 vêk khan mi 465-te swab sample endik niin, nimin zing khan result tihchhuah a ni a, mi 443-in hripui an vei loh laiin, mi 22-in an vei tih an hmu chhuak.

Covid-19 vei hmuh chhuah thar mi 22-te chu mipa 19 leh hmeichhia pathum, kum 21-56 inkar an ni a; Aizawl district mi 14 (mipa vek), Siaha district mi pali (mipa pakhat leh hmeichhia pathum) leh Lawngtlai district mi pali (mipa vek)-te an ni.

Aizawl district mi 14-te chu Lung­verha awm 1st Bn, NDRF (Echo) company mi leh sa 10 leh Zokhawsanga awm Assam Rifles mi pali an ni. NDRF mite chu Manipur, Bihar, Uttar Pradesh, Punjab, Jammu & Kashmir, Assam leh Jharkhand aṭanga rawn kalte niin, Assam Rifles mite chu Delhi, Assam leh Jharkhand aṭanga rawn kalte an ni a; taksaa harsatna nei an awm rih lo. Siaha district mi palite chu Delhi aṭanga haw vek an ni a, pakhatin harsatna (symptom) a neih loh laiin, mi pathum chuan symptom an nei. Lawngtlai district mi palite chu Guwahati aṭanga rawn hawte niin, symptom nei an awm rih lo. ZMC-a hripui vei hmuh thar mi 22-te hi quarantine facility-a awm lai vek an nih thu sorkar thuchhuah chuan a tarlang.

Hetih lai hian, Champhai district mi Covid-19 vei vanga Champhai Dedicated Covid health Centre (DCHC)-a enkawl mek zinga pathum, mipa vekte chu an dam tawh avangin June 4, Inrinni khan chhuahtir an ni a; Khawzawl DCHC-a enkawl mi pahnih, hmeichhia ve ve leh Siaha DCHC-a enkawl zinga mi pakhat Nell Hlychho-te chu an dam tawh avangin nimin khan chhuahtir an ni bawk. Mamit district-ah chuan Covid-19 la vei zinga pathum chu July 4-a ZMC laboratory-a an sample endik nawnnaah hripui an vei tawh lo tih finfiah a ni a, chhuahtir erawh an la ni lo.

Heti hian Mizorama Covid-19 vei hmuh chhuah tawh mi 186 zinga mi 139 chuan an vei tawh lo (negative) tih finfiah a ni tawh a, mi 47-in an vei mek. Vei tawh lo mi 139 zinga 133 chu enkawlna hmun aṭangin an chhuak tawh a, negative tawh zinga mi paruk DCHC-ah an la awm mek thung. Hnahthial district aṭangin Covid-19 vei hmuh chhuah an la awm lo zel a; tun dinhmunah Kolasib, Serchhip, Saitual leh Khawzawl district-ah hripui vei an awm tawh rih lo bawk.