RS MP inthlanah MNF candidate-in Vote 28 a hmuh ka ring - B Chhanzova

Rajya Sabha MP inthlana Zoram Peoples' Movement (ZPM) candidate B Lalchhanzova chuan, vawiina Rajya Sabha MP inthlan turah MNF candidate K Vanlalvena'n MLA 28-te vote a hmuh a rin thu a sawi.

B Lalchhanzova hian nimin khan Aizawl Press Club-ah thuthar thehdarhtute kâwmin, MLA pasarihte vote hmu tura a inngaih thu a sawi a, "Inthlan turah hian INC-te'n vote 5 hmuin, rorel lai MNF party-te hi NDA inbáwkkhawma tel an nih avangin anmahni MLA neih sa 27 bakah, vote pakhat hmuh belhin vote 28 a hmuh ka ring," a ti.

ZPM party chu eptu pawl lian ber an nih avangin Rajya Sabha MP chuh ve ngei ṭha an tih thu sawiin Chhanzova chuan, "Candidate chanvo chu ka chungah a tla a ni. Kan hotute'n min ring tâwk a, he mawhphurhna min pe hi lawm takin ka pawm a ni," a ti a; a theih ang angin mipui hnenah a din chhan leh RS MP pawimawhna puandarh chu an hotute thlazar hnuaiah a kalpui ve zel thu a sawi.

B Lalchhanzova chuan, RS MP inthlan chu kum dangah chuan mipuiin an hriat lem loa kalpui a nih ṭhin thu sawiin, "Thlan tlin an nih hnuah an pawimawhzia kan hre chiang leh chauh ṭhin. Ruling party-te hian tih tak zeta ngaihtuah lam ai chuan, an party-a an duhsak zawng emaw, phùm bo an tum emaw dah nan an hmang ṭhin anga ngaihnate pawh a awm hial ṭhin," a ti.

Rajya Sabha inthlan chu ZPM-in an ngai pawimawh hle tih sawiin Lalchhanzova chuan, "Mipui hnena Rajya Sabha MP awmzia leh nihphung hriat zauna tura inhrilhhriatna hun pawimawh tak ni-ah kan ngai," a ti a; tlin dawn leh dawn loh ngaihtuah loin, party an nih anga ram roreltu thlannaa chuh ve chu ram awm zel dan tur thlirin ṭul an tih thu a sawi.

B Lalchhanzova chuan, ZPM chu kal­phung mumal tak neiin a kal tih sawiin, "Val Upa Council uapna hnuaiah kalin ZLP MLA pasarihte'n min thláwp a ni. Kan sorkar huna ṭha zawka ram ro kan relna tur atana kan hmachhawpte uluk taka duangtu pawl Research Wing ṭha tak kan nei a, chung ho chuan rim takin hma an la mek a ni," a ti.