Bru-te hnenah chhawmdawlna hlân

Tripura state chhunga Bru relief camp paruk aṭanga October-November 2019 chhunga Mizoram mi leh sa hruai kîrte chhawmdawlna tur, sorkar laipuiin a pek turte chu January 9, Ningani khan Mamit DC Dr Lalrozama'n an awm mekna khaw hrang hrangah kal chilhin a hlan. Bawrhsap hi Mamit SP Shashank Jaiswal chuan a ṭawiawm.

Bru chhawmdawlna tur hi sorkar laipuia Ministry of Home Affairs (MHA), Mizoram sorkar, Tripura sorkar leh Mizoram Bru Displaced People Forum (MBDPF)-te'n inremna an lo siam tawh anga ruahman a ni a; Ningania Mamit DC-in a hlan tâk chu Rs. 4,00,000 an dawn tur, kum hnih chhung bank-a term deposit-a dahna certificate a ni. Chhawmdawlna sum cheng nuai 4 chu sorkarin Mizoram Cooperation Apex Bank-ah a dahsak a, inremna awm sa ang­in Mizorama Bru rawn lette chuan Mizorama kum thum an awm hnuah sum faiin an la chhuak thei ang.

Dr Lalrozama chuan, Tripura relief camp aṭanga Mizoram mi leh sa hruai lette chhawmdawlna turin sorkar laipui leh Mizoram sorkarin a tiam ang ngeiin ṭanpuina awm theite pek hna zawh thawkhat a nih tawh thu a sawi a; Bru-te chu Mizoramah thlamuang taka awm tur leh an awmna khua ṭheuhah khua leh tui ṭha tak ni turin a chah. Mamit DC-in bank term deposit certificate a hlante chu - Bawrai-ah chhungkaw 16, Zamuangah chhungkaw pariat, Réngdilah chhung­kaw 16 leh Sihthiangah chhungkaw pathum an ni. Bru lak let vawi 9-na, October-November 2019 chhunga kalpuiah Mamit district-ah hian chhungkaw 199 an lêt a; Ningania Bawrhsapin bank term deposit certificate a hlan bâk chhungkaw 156-te chu hun remchang dangah hlan leh an ni ang.