ZPM-in Covid-ah inruahman lâwk turin ngen

Zoram Peoples' Movement (ZPM) elected office bearers (extended) meeting, July 3, Zirtawpnia neih chuan resolution siamin, Covid-19 hripui chu fimkhur leh khauh taka do chhunzawm a ngai dawn tih an tarlang a, Mizoram sorkar chu lo inruahman lâwk tawh turin an ngen.

ZPM resolution chuan, "Covid-19 hripui hi fimkhur tak leh khauh taka do chhunzawm a ngai ngei dawn a, sorkar ber hi lo inruahman lawk tawh ṭhin turin ZPM chuan a ngen a ni. Ruahmanna siam thar a awm leh hunah, invèn hna thawh hautakna lai bera thawktu, ramhnuaia riahchilhtute hi mangnghilh hauh loh ni tawh se a lawmawm hle ang," an ti.

MLA pakhatin MLA LADF hmanga RT-PCR khawl a lei chu mipuite'n an mamawh hmanhmawh viau laiin, sorkara pek luh tum danah leh sorkarin a lo dawnsawn danah politics-a hamṭhatna neih tel duhna leh hamṭhatna dawng an awm hlauhna a awma ngaih theih thu inchuh a awm chu pawi an tih thu ZPM chuan an tarlang a, "A dik zawk hriat harsa khawpa inpuh tawnna a awm hi pawi kan ti tak zet," an ti a; tunah ṭha taka an inhlan thei ta chu a lawmawm an tih thu leh ram hruaitute chu inzah tawn taka mipui rawngbawl tura an duh thu an tarlang.

ZPM chuan, Covid-19 léng Mizoramin a lo hmachhawnnaah, mipui ṭan rualna leh thuawihna chu chhuanawm an tih thu an sawi a, "Hun harsa leh khirh kan tawh laia mipui himna leh thlamuanna atana chi hrang hranga thawktu zawng zawngte chungah lawmthu kan sawi nawn leh a ni," an ti.