Aitlang hmuna ram neitute'n Sorkar aṭangin thu la hmu lo

Vairengte Aitlanga rama ram neitu mi eng emaw zat chuan Assam Police-te avangin an rama an hmunphiahte an la seng thei lo. Ram neitute hian an harsatna tawh hi thuneitute hnenah thlen tawh ṭhin mah se, chhanna an la dawng lo.

Aitlanga ram neitute'n Vanglaini an hrilh danin, an hmunphiahte an seng theihna atan hmalak sak turin sorkar ngen tawh ṭhin mah se, sorkar lam aṭangin chhanna an la dawng lo. Mizoram sorkar hotute hnena thleng tura lehkha an siam Vairengte SDO (C) hnena an pek pawh hmalakna awm chuang loin SDO (C) hnenah hian a kir lehin an hria a ni.

Ram neitute chuan an lehkha chu Vairengte SDO (C) hian Kolasib DC hnenah a thawn thu sawiin, "Kan hriat danin Kolasib DC hian Home department-ah a thawn chhawng leh a ni. Mah se, Home department hian tihngaihna vak hre loin, a area a nih angin a ṭul anga hmala tura tiin Kolasib DC hi an thawn let leh a ni. DC pawhin tihngaihna vak hre loin SDO (C) hnenah a thawn leh tawp a ni," an ti.

Aitlanga ram neitute hian August 9, 2021 khan chief minister Zoramthanga hnenah memorandum an lo thehlut tawh a, "Kum 50 chuang zet kan lo enkawl tawh, Mizoram chhung ngei Assam lamin min rawn hnehchhuh mai leh kan thlaite an rawn suasam chiam mai hi a mak kan tiin hriatthiam a harsa kan ti takzet. Hmalak vak ngaihna leh a kawnghmang pawh kan hriat loh avangin sorkar hmalakna kan ngaichang tawp," an ti.

Tha leh zung tam tak senga an lo enkawl an huan sawisak a ni chuan an rilru a tihnat takzet thu Chief Minister hi hrilhin ram neitute chuan, "Assam Police-in kan ram min laksak zat hi ṭin 80 leh a chanve vel a zau niin, kum tin Rs. 2,000,000 chuang man thlai kan thar chhuak ve ṭhin," an ti a, an thlai thar rah chu kum telin a man a tam ve tial tial thu an tarlang.

Vairengte Aitlang hmuna ram neitute chuan January 13, 2022 khan Aitlanga inkulh Assam police hotute telephone hmangin an bia a, an hmunphiahte lak phalsak turin an ngen. Assam police-te chuan, thuneitu sang zawk aṭanga thu an hmuh loh chuan an phal loh thu an lo hrilh.

Central YMA pawhin January 13, 2022 khan chief minister Zoramthanga hnenah Vairengte leh a chhehvela Mizote'n an huan thlai leh hmunphiah an seng thei lo chu ṭha an tih loh thu thlenin, chak taka hma la turin a ngen a; Chief Minister chuan CYMA hruaitute chu hma a lak nghal tur thuin a lo chhang a ni.