HFW Minister-in mobile I-lab a tlawh Khâwl mamawh lei tum mek a ni - Minister

Ministry of Science & Technology-in Mizo­ram tana mobile I-Lab (infectious disease diagnostic laboratory) a pek chu January 29, Inrinni khan Health & Family Welfare minister Dr R Lalthangliana leh HFW Board vice chairman Dr ZR Thiamsanga, MLA-te'n dah mekna hmun Lengpui damdawi-in (CHC)-ah an tlawh. Mobile I-Lab hian ni khatah swab sample 50 vel a endik thei a ni.

Dr R Lalthangliana chuan, mobile RT-PCR lab tia sawi mobile I-Lab chu January 20, 2022 khan CM Zoram­thanga leh Union Science & Technology minister Jitendra Singh ten an hawn thu sawiin, "Hmarchhak state zinga dawng hmasa ber leh dawng awmchhun kan ni a, a thlawn liau liaua kan dawn a ni. Manipur-ah private company ta man neia hman tur a awm," a ti a; a nihna ang taka hmang ṭan turin mobile I-lab khawl mamawh lei tura hmalak mek a nih thu a sawi.

ZMC-ah RT-PCR khawl pariat leh Lung­lei­ah khawl pakhat a awm thu sawiin Health Minister chuan, "Cham­phaiah dah turin kan inruahman mek a, khawl pawh Champhaiah a awm tawh. Khawlin a ken tel bungraw hrang hrang kan la khawm mek a, khawl bunna tur sak hna pawh kan thawk ṭan tawh," a ti.

Dr ZR Thiamsanga chuan, Covid-19 a lèn tawh loh hnuah pawh mobile I-Lab chu natna dang zawn chhuah nan a ṭangkai dawn tih a sawi a, "Covid-19 vei thi kan chhinchhiah zingah ṭhalai, natna dang nei lem lote pawh tun thlengin an la awm reng a, ventilator mamawh, serious tak tak pawh an la awm reng a ni," tiin, hripui léng chu sawi nêp chi a ni rih lo tih a sawi.

Covid-19 thupuangtu Dr Pachuau Lalmalsawma chuan, hripui lakah mi tin fimkhur turin a chah a, "Mipui kan harh chhuaha kan fimkhur tlan a ngai tak zet. Kar hnih chhung vel mi tin hian uluk takin nunphung dik zâwm ṭheuh ila chuan hripui léng hi a reh duak thei a ni," a ti.

ZMC Microbiology department-a assistant professor Dr Gracy Laldinmawii sawi danin, April 7, 2020 aṭangin ZMC-ah RT-PCR hmangin swab sample endik a ni a; mobile I-lab chu a danglam deuh avangin thawktu turte uluk lehzuala training pek a ngai dawn. Mobile I-lab chuan hna thawhna atana ṭul khawl chi li vel mamawh a la nei a ni.

Health dept. hotute chuan, "Mobile I-lab hian thingtlang hmun kilkhawr ber berahte kal theih lohna a nei a nih chuan, a kal theih chin tàwp berah inhúngin, mipui pan theih turin kan inchhawp hnai ṭhin dawn a ni," an ti.

Mizoram sorkar leh Institute of Bioresources and Sustainable Development-te'n inremna an ziah dan chuan - mobile I-lab mamawh chi hrang hrangte leh thawktu laboratory technician, data entry operator leh driver pakhat ṭheuh hlawh chu kum khat chhung IBSD-in a tum dawn a, kum khat hnuah Mizoram sorkarin senso zawng zawng a tum tawh ang.

Mobile I-lab hi cheng nuai 105 man a ni a, sample endiktu tur laboratory technician-te chu tun karah ZMC-ah zirtir an ni dawn a; lirthei registration buaipui mek a nih bakah, National Accreditation Board for Testing and Calibration Laboratories (NABL) hnenah hman phalna license dil mek a ni bawk.