MNF-in sorkar hmalakna an chhuang

MNF party chuan July 4, Inrinni khan thuchhuah siamin, Covid-19 hripui léng kara ram intodelhna leh hmasawnna tura Mizoram sorkar hmalakna chhuanawm an tih thu an tarlang.

MNF chuan, MPCC Media Cell-in July 2, 2020-ah thuthar lakhawmtute kâwmin, hripui lèn laia hna thawhna tur work order tihchhuah an ngaihthiam loh thu an puang a, chumi hnuah State department-in press release hmangin an sawifiah tih an tarlang a, "Heti chung hian ngawhngawl chhuahin work order an la hâl zui zel duh a ni," an ti.

Ngaihtuah chiang loa nakin lawka mite nuihzat leh tura lehkha hâl ngawt a awm thei nia sawiin MNF chuan, "MPCC-in an thlirna hi ram a hmangaih loh thlak hleah kan ngai a, ram hmasawnna dona, intodelh tura sorkar hmalak mekna dona a ni tih kan puang, an ti a; hripui léng nasa tak kara indawm kun mai loa sorkarin intodelh tur leh hmasawn tura a beih dan chu ropui an tih thu an sawi.

MNF party chuan, hripuiin khawvel a dâp a, Mizoram pawh a buai hle tih sawiin, "Heti chunga kan CM Pu Zoramthanga kaihhruai sorkarin intodelhna tur leh hmasawnna lam hawia ke min pênpui thei hi a lawmawm kan ti. CM, minister-te leh sorkara mawhphurhna latute inpekna leh hnathawhte hi kan chhuang tak zet a ni," an ti.