Suma harsatna vangin SEDP-ah Mipui beisei ang kan pha dawn lo - C Lalrinsanga

Minister C Lalrinsanga chuan January 29, Inrinni khan MJA, Lunglei district Annual Conference a hmanpuinaah thu sawiin, sum lama harsatna avangin SEDP-ah mipui beisei ang an pha dawn loa an hriat thu a sawi.

Minister C Lalrinsanga chuan, sum lama harsatna tawh mek chu a bumro hle tih sawiin, "Mipui beisei ang chu SEDP-ah kan pha dawn lo tih kan hria a, kalpui chu tum a ni tho a, vaimim leh bekangah cheng vbc. 164 sênnaah vbc. 200 dáwn erawh thawh chhuah kan nei ve tawh," a ti a; RKVY aṭangin bekang hriak herna khawl thehluh a nih thu leh ruahmanna siam a nih thu a sawi.

Kuhva chungchang sawiin C Lalrinsanga chuan, Myanmar aṭanga lak luh kuhva chu smuggling goods a nih thu leh Zokhawthara Land Custom Station chu Mizoram ta a nih loh thu a sawi a, "Kum 2005 khan enkawl turin Agriculture department min ti a, kan tum ber chu ram páwn aṭanga lo lut item 22-te a ni a, virus, etc. a keng em tih chiah enfiah tura thupek kan ni. Movement-ah thu kan nei lo a, permit kan pek theih pawh a ni lo. Natna enfiahtu mai kan ni," a ti.

C Lalrinsanga chuan, Lunglei Muni­cipal Council chungchang sawiin, "Ram a ṭhan dawn chuan danglam a ngai a, kan chàn tur anga ngaih hi kan dawn tur a awm tho dawn a ni," a ti a; bial (ward) awm dan tur uluk zawka thlir zel a ngaih thu a sawi.