Thenzawl NGO-in doctor sawnna thupek an hâl

Thenzawla doctor awm mek pathum zinga pakhat sawn chhuah tum duh loh lantirna atan Joint NGO chuan nimin khan Thenzawl Field Veng kawngah doctor transfer order an hâl.

Thenzawl Joint NGO tarlan danin, Thenzawl damdawi-in, community health centre (CHC)-a doctor pahnih awm mek zinga pakhat zawk chu January 25, 2022 khan Sialhawka sawn turin transfer order tihchhuah a ni a, Police Training School, Thenzawla doctor pakhat chu Thenzawl CHC-ah dahin, PTS nena hmui tura tih a ni.

Thenzawl khawtlangin doctor indaih lohna avangin an mamawh ang zat leh neih tur ang doctor an neih theih loh thu tarlangin Thenzawl NGO chuan, "January 25, 2022 khan Dr Benjamin Malsawmtluanga chu Thenzawl CHC aṭangin sawn chhuah a ni a, Dr Lalramhluna, PTS-a mi chu Thenzawl CHC leh PTS enkawl kawp tura dah a ni," an ti.

Thenzawl NGO chuan, doctor sawn chungchangah khawtlang aiawh hruaitute a rang lamin Aizawlah an kal thu tarlangin, "Department hotute leh minister-te an va hmu a, kan khawtlangin doctor kan mamawh belh zawk ziate an va thlen a, lawm takin kan khawtlang hruaitute chu beiseina sang tak nen an rawn haw a ni," an ti a, khawtlang hruaitute pawh an lawm hle thu an sawi.

Beiseina sang tak nen sorkar thuchhuak an ngaihchàn laiin, January 28, 2022 khan Dr Benjamin Malsawmtluanga chu a post ngaiah dah lêt a ni a, a aiah Dr Lalramhluna chu sawn chhuah a nih tâk zawk thu tarlangin Thenzawl NGO chuan, "Hetianga thil kalpui a ni ta mai hi Thenzawl khawtlang chuan mak kan tiin kan rilru a na hle a ni," an ti.