KHAWTHLIR

Assam-in kawng Laih an tum
Assam sorkar chuan tun hnai khan Mamit district-a Thinghlun khaw ram Mizoram chhungah Tlawngte luia lei (bridge) dawh kài a, Medili thlenga tlang tur kawng laih an tum. Kawng siam hna hi thawh mek a ni a, Tlawngte lui kam thleng laih a ni tawh. Kawng laih tlang a nih chuan Thinghlun khaw mi huan, lo, ram, leilet leh dil neite'n an ram eng emaw zat an chán thei dawn nia thu dawn a ni. Mamit DC Dr Lalrozama chuan January 27, 2022 khan kawng laihna hmun a enfiah a, Assam sorkarin Mizoram chhungah kawng a laih tlang zel loh nan hmalak nghal a ṭul thu a sawi.

Thisen pe
Inrinni khan KṬP, Mission Vengthlang Branch chuan an kohhran hall-ah Synod Hospital tan thisen unit 44 an pe a, petute mipa 29 leh hmeichhia 15 an ni. KṬP, Upper Republic Branch-in Venghlui Bial KṬP golden jubilee pualin Civil Hospital, Aizawl tan unit 38 pein, petute mipa 29 leh hmeichhia pakua an ni a; KṬP, Khatla South Branch-in an kohhran hall-ah ZMC tan unit 31 an pe a, petute mipa 27 leh hmeichhia pali an ni. ṬKP, Theiriat Pastor Bial-in Lunglei Civil Hospital tan unit 44 an pe bawk a, petute mipa 38 leh hmeichhia paruk an ni.

MP model village
Rajya Sabha MP K Vanlalvena'n Sansad Adarsh Gram Yojana (SAGY) hnuaia model village atana a thlan Páng khuaah January 28, Zirtawpni khan Lawngtlai bawrhsap Andrew H Vanlaldika'n model village bul ṭanna a hawng a; SAGY model village chungchang zirhona hun hman nghal a ni.

Fimkhur turin Mipuite chah
Fire and Emergency Services (FES) chuan mipui fimkhur tura ngenna thuchah an tichhuak a; kângmei chhuak ṭhin chu a tlangpuiin inthlahdah vang a nih thu an tarlang. FES chuan, khua a ṭhàl leh ṭan tawh avangin kângmei lakah fimkhur zual a pawimawh tih an tarlang a, "Tun hnaiah pawh hmun hrang hrangah kângmei chhuak vanga in leh lo chán hriat tur a awm leh ta nual. Kângmei chhuak hi a tlangpuiin inthlahdahna vang a ni ṭhin a, vanduai vang hrim hrim hi chu thil thleng khát tak a ni," a ti.