Journalist Pension Scheme March 2022-a Peih turin sorkar kan ngen tak meuh a ni - MJA President

MJA, Lunglei district leh Lawngtlai district chuan tun hnai khan Annual Conference an hmang a; an hun hmanpuitu MJA Gen.Hqrs president Zonunsanga Khiangte chuan, "Kumin March thlaa MJA golden jubillee lawm hunah Journalist Pension Scheme hman theih a min peihsak turin sorkar kan ngen tak meuh a ni," a ti.

Lunglei MJA chuan January 29, Inrinni khan Lunglei Press Club-ah Annual Conference an hmang a, vice president Lalrintluanga Khiangte-in a kaihruai. Khualzahawm Zonunsanga Khiangte chuan, "Journalist Pension scheme hi hun rei tak kan sual tawh a ni," tiin, MJA Golden Jubilee kumin March thlaah ngei tihhlawhtlinsak turin sorkar an ngen tih a sawi.

Zonunsanga Khiangte chuan, journalist hna chu mipui rawngbawlna, inthlahdah theih loh, inchher thar reng ngai leh sorkar policy pawh zir ve zel ngai a ni tih sawiin, "Journalist-te kan thawh rim a ngai. Sum leh paiah tuihâl huam huam ve a chi lo a, kan tawrh hi a chhel bawk a ni," a ti a; chanchinbumite chu an hnate Pathian rawngbawlna a ni tih pawm turin a chah.

Inkhawmpuia khuallian minister C Lalrinsanga chuan, journalism chu hna ropui tak a nih thu sawiin, "Information technology-ah print media hlutna a awm reng laiin hlâwkna a tlahniam deuh ta hi rilru ngaihtuahna luahtu a ni. News piah lamah mipui harsatna sutkian nana media-te hnathawh a ropui hle," a ti a; àwn lam neia kal in MJA hlutna a tihniam thei tih sawiin, Lunglei MJA member-te chu theihtawp chhuaha ṭan la zel turin a chah.

Lunglei MJA hian kum 2022-2024 chhunga office bearer turte an thlang a; president atan Laltlanthanga, vice president atan Thanghmingliana Renthlei leh treasurer atan V Rokhawliana te an thlang. President H Lal Thansanga pawhin thu a sawi bawk.

MJA, Lawngtlai district chuan January 28, Zirtawpni khan Lawngtlai Press CLub-ah Annual Conference an hmang a; Lawngtlai West bialtu MLA C Ngunlianchunga khuallian niin, MJA Gen.Hqrs President khualzahawm an ni.

C Ngunlianchunga chuan, Lawngtlai district MJA-te duhsakna leh fuihna thu a sawi a; sorkar khalh ngilna kawnga sûl sutu leh mipui hnena thu dik kawhhmuhtu nih tum zel turin a chah. Khuallian hian Lawngtlai District MJA Pension Fund-a hman turin Rs 20,000 a hlan a ni.

Lawngtlai MJA hian kum 2022-2024 chhunga office bearer tur an thlang a; president atan Lalngheta Ralte, vice president-ah Elvis Lalthangzuala leh treasurer atan H Lalrinmawia te an thlang.