Eptu party-te'n President's Rule-a Mizoram dah theih nan hmalak tum

Mizorama eptu party hrang hrangte chuan, Mizoramah Constitution bawhchhiatna leh dan leh thupek kenkawhna a hlawhchham avangin Mizoram chu President's Rule-a dah tura hmalak an tum.

Eptu party hrang hrang aiawhte chu January 28, 2022 khan BJP, Mizoram Pradesh pisaah kal khawmin, Mizoram dinhmun chungchangah an inráwn khawm a, Mizoram BJP president Vanlalhmuaka'n a kaihruai.

Mizorama sorkarna chelh mekteah India danpui bawhchhiatna leh dan leh thupek kenkawh kawngah sorkar a hlawhchham avangin Mizoram chu President's Rule-a dah a nih theihna turin hmalak an rêl a ni.

Inràwnkhawmnaah hian political party aiawha kalte leh mimal sawm bikte'n thu an sawi a; February thlaa Assembly session awm tura sorkar rin tâwk lohna, no confidence motion put luh chungchang pawh an sawiho a, mahni party-ah ṭheuh sawiho phawt turin an dah. Mizoram kalphung dik lo siam ṭhat hna thawk tura ṭan rual ṭha an ti a; hun remchang hmasa bera ṭhutkhawm leh ṭha an ti bawk.