Lunglei Civil Hospital-a inentir tum BSF sipai pahnihin Covid-19 an vei

Lunglei Civil Hospital (LCH)-a July 3, 2020-a inentir tum BSF 131 bat­talion sipai pahnih chu July 3 vêk khan an swab sample TrueNAT khawl hmangin enfiah a ni a, July 4 khan Covid-19 an vei tih puan a ni.

LCH hotute hnen aṭanga Vanglaini thu dawn danin, Covid-19 léng vangin damdawi-in gate bulah screening point siam a ni a; BSF sipai pahnih inentir tura kalte chu screening titute'n rinhlelhawma an ngaih avangin damdawi-ina lut lo turin an ti a ni. A ṭul angin an buaipui nghal a, an swab sample lak nghal a ni.

BSF sipai pahnihte'n Covid-19 an vei tih hmuh chhuah a nih tâk avangin nimin khan Lunglei Civil Hospital leh a chhehvel chu disinfectant hmangin an phuh nghal. Vanglaini palai zawh­na chhanga Lunglei police hotute sawi danin, BSF sipai pahnihte hi Dolcherra, Assam-ah June 14-24 chhung khung hran an nih hnuah July 25, 2020 khan Mizoram an rawn thleng a, Melte-a an headquarters-ah awm nghal loin, Covid-19 vanga quarantine hmun ang deuha an hman transit camp - Vanhne-ah awmtir an ni.

An khuh nasat avangin July 3 khan damdawi-inah hruai an ni a, Covid-19 an vei tih hmuh chhuah a ni. Vanhne-a transit camp-ah hian mi 21 awmin, khaw mite nen an intlawhpawh loa hriat a ni a; BSF-te chu transit camp-ah tu mah lut leh chhuak tawh lo tura hriattir nghal niin, awm mekte pawh an swab sample endik a ni ang. BSF sipai mi pahnihte hian hripui an kai chhàwn theih àwma ngaihte chu Lungleia Health department lamin an chhui zui nghal a ni.