Covid-19 vangin mi 605 thi tawh

Nimin khan tlai dar 5 thlengin Mizoramah Covid-19 vangin mi pathum an thi a, January 28, Zirtawpniah mi pathum leh January 29, Inrinniah mi panga an thi bawk a, January 21, 2022-a thi tarlan thar pakhat a awm bawk. Mizoramah hripui vangin mi 605 an thi tawh a, kumin January thla bikah mi 59 an thi tawh.

January 21, 2022 zing dar 2:15 khan S Thangkhawmanga (74), Darlawn Venghlun chu Covid-19 vangin an inah a thi a; Covid-19 vei a ni tih January 15 khan hmuh chhuah a ni a, natna dang nei tel a ni.

January 28, Zirtawpni chawhnu dar 3 khan MC Lalchhuansanga (46), Khawlian, Aizawl district chu hripui vangin an inah a thi a, January 26 khan Covid-19 positive a ni tih hmuh a ni. Kapthangi (74), Serkawn, Lunglei chu January 28 tlai dar 5:20 khan Lunglei DCHC-ah a thi a, hripui a vei tih January 22-ah hmuh a ni. Rengzika (78), Sihphir pawh January 28 zan dar 9:15 khan State Refferal Hospital-ah a thi a, Covid-19 vei a ni tih January 19 khan finfiah a ni. January 28-a thite hi natna dang nei tel vek an ni tih sorkar thuchhuakin a tarlang.

January 28 zanlai dar 12 (January 29) Lalchianga (89), Tlangnuam chu SRH-ah a thi a, hripui vei a ni tih January 15-ah hmuh chhuah a ni. January 29 chawhma dar 9:30 khan Chaltuaia (77), Reiek chu hripui vangin an inah a thi a, natna dang nei tel niin, January 19 khan Covid positive a ni tih finfiah a ni. Samson Lalrinkima (7), ITI Veng chu Inrinni chhun dar 12:45 khan Covid-19 vei a ni tih finfiah a nih hnu lawkah LRM Hospital-ah Covid-19 vangin a thi a, SRH-a enkawl tura hruai a nih laiin a thi a ni.

January 29 tlai dar 4 khan Engthangvunga (74), Laipuitlang chu SRH-ah a thi a, hripui vei a ni tih January 17-ah hmuh a ni. R Lalthangi (65), Zobawk, Lunglei pawh Inrinni tlai dar 4:30 khan SRH-ah a thi a, hripui vei a ni tih December 24, 2021 khan hmuh a ni. An pahnih hian natna dang nei an ni tih sorkar thuchhuakin a tarlang.

Nimin zing dar 7:30 khan Thangseii (78), Sailutar, Aizawl district chu SRH-ah a thi a, January 10 khan Covid-19 positive a ni tih hmuh a ni. Zing dar 9:25-ah Biakthansanga Khiangte (61), Lunglei Zotlang chu SRH-ah thi a, natna dang nei tel niin, hripui a vei tih January 20 khan hmuh chhuah a ni. Rualzakhuma (70), Vaivakawn pawh nimin chawhma dar 11:15 khan SRH-ah a thi a, Covid-19 vei a ni tih January 25 khan hmuh a ni.