An intiam ang ngeiin nuai 3 sem rawh se - ZPM Ṭhalai

ZPM Ṭhalai chuan thuchhuah siamin, MNF hruai Mizoram sorkar chu mipui sorkar ni loin, party sorkar a nihzia a lang chiang hle tih an tarlang a, “Pathian leh kan ram tan tih thupui phêna sual rawngbawltu MNF party i hnâwl ngam ang u,” tiin mipui an sáwm a, MNF sorkar chu an intiam anga cheng nuai thum sem turin an phût.

MNF chu inthlan campaign laiin SEDP hmanga cheng nuai thum aia tlem lo sem tiamtu an nih laiin, January 28, 2022-a MNF president leh chief minister Zoramthanga’n Kolasib Diakkawn YMA Hall-a thu a sawiah, SEDP thlangtu tur chu MNF unit an nih tur thu a sawi tih ZPM ṭhalaite chuan an tarlang a, “Congress, ZPM leh party dang chhungkua aṭanga thlan ve an nih a rin loh thu a sawi chuan mipui a barakhaih hle. Mipui sum tam tak hi MNF unit-te’n an nawm an mâka an khawih tur em ni?” an ti.

ZPM Ṭhalai chuan, “NLUP dawng tawh zawng zawngte pawhin SEDP an dawn tur thu tiamtu CM Zoramthanga hian sorkar kum tharah chhungkaw 50,000-60,000 vel lek hnena pêk a tum leh si hi anmahni thlang tlingtu mipui thamlohna lian takah kan ngai,” an ti a; MNF hruai sorkar chu an intiam ang ngeia SEDP hnuaiah chhúng tinah cheng nuai thum aia tlem lo, nuai thum chung lama sem ngei tura an phût thu an sawi.