Ni 2 chhungin hripui vei 3,961 hmu chhuak

Mizoramah Covid-19 vei January 28 khan mi 2,142 leh January 29-ah mi 1,819 hmuh chhuah a ni a, ni hnih chhungin mi 3,961 hmuh a ni. January thla chhungin mi 30,022 hmuh a ni tawh. Inrinni leh nimin khan hripui vei dan tawh mi 2,921 chhuahtir an ni a, hripui vangin mi pariat an thi.

Kar kal ta chhung zawng khan Mizoramah hripui vei ni tin mi sang khat aia tam hmuh a ni a, mi sang hnih aia tam hmuh chhuah ṭum ni thum a awm. Swab sample endik aṭanga positive hmuh zat (positivity rate) pawh 20% chung lam vek a ni.

January 28-a Covid-19 vei hmuh chhuahte chu mipa 934 leh hmeichhia 1,208 an ni a; RT-PCR hmanga hmuh 379, TrueNAT hmanga hmuh 65, RAT hmanga hmuh 1,669 leh FIA hmanga hmuh 29 an ni. An zinga mi 1,216-in symptom an nei a, symptom nei lo 926 an awm.

January 29-a hmuh tharte chu mipa 768 leh hmeichhia 1,051 an ni a; RT-PCR hmanga hmuh 483, TrueNAT hmanga hmuh 48, RAT hmanga hmuh 1,282 leh FIA hmanga hmuh paruk an ni. Mi 1,819 zinga 901-in symptom an nei a, 918-in symptom an nei lo.

IPR tarlan danin, January 28 khan Lengpui Airport-ah state páwn aṭanga rawn lut zingah RAT hmangin Covid-19 vei mi 30 hmuh chhuah a ni a, screening point dang - Kanhmunah mi pakua leh Tuivaiah mi panga hmuh a ni. January 29 khan Lengpui Airport-ah mi 16, Vairengteah panga, Kanhmunah paruk, Tuivaiah pahnih leh Bairabi-ah mi pakhat hmuh a ni bawk.

January 28 khan hripui vei mi 30 aia tam hmuhna khua/veng 10 a awm a, Aizawla hmuh tamna ber veng Electric Vengah mi 89 hmuh niin, thingtlang lama hmuh tamna ber Buangpuiah mi 70 hmuh a ni. January 29-ah chuan mi 30 aia tam hmuhna khua/veng pakua a awm.

Nimin tlai dar 5 thleng khan hripui vei dam tawh mi 1,310 chhuahtir an ni a, Inrinni khan mi 1,611 an chhuak bawk.

IDSP record angin, Mizoramah Covid-19 vei 1,71,686 hmuh chhuah a ni tawh a, mipa 81,447 leh hmeichhia 90,239 an ni a, mipa aiin hmeichhia 8,792-in an tam zawk. Nimin tlai dar 5 thleng khan mi 1,57,584 (91.79%) chhuahtir an ni tawh a, mi 605 (0.35%) thi tawhin, enkawl mek mi 13,496 (7.86%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 1,71,686 chu mi 1,000 zelah hripui vei mi 156 an awm ang a ni a; mi 1,00,000 zela Covid-19 vangin mi 54 an thi tawh ang a ni tih sorkar thuchhuakin a tarlang.