CM thusawi - hnam zahawmna tihbawrhbânnaah BJP-in an ngai

Mizoram BJP chuan, Mizoram Chief Minister thusawi thleng dik a awm ngai lo nia sawiin, hnam zahawmna tihbawrhbànnaa an ngaih thu an tarlang.

BJP thuchhuah chuan, CM Zoramthanga’n Kolasib-a a thu sawiah, inthlan campaign laia a thusawi ṭhiat a, SEDP hnuaiah cheng sing tlemtê chauh sem a nih tur thu a sawi chu mak an tih thu a tarlang a, “Mizo mipui min tham lo lutuk leh a duh duha tih kâwi mai mai theih anga min ngai hi hriatthiam har kan ti a, state khat hotu lu ber tih atan a zahthlak hleah kan ngai,” a ti.

BJP chuan, “CM Pu Zoramthanga’n a thutiam bawhchhia a, amah thlang tlingtute beisei cheng nuai 3 a theih ang anga sawi bo ṭhen a, sawi mâm a tum fo leh cheng sing hnih/khat chauh sem an tum leh ta hi an thutiama an rinawm lohzia tichiangtu a ni,” an ti a; “CM dâwt sawi chíng neih hi state dangte’n min hmuh dan tur ngaihtuahin a zahthlak kan ti hle a, a hnam ang pawha kan zahawmna tihbawrhbànnaah kan ngai,” tiin, CM Zoramthanga chu thu dik chauh Mizoram mipui hrilha tiam tawh turin an ngen a ni.