Mamit Bawrhsap Aizawlah hruai a ni ; Bhupesh Chaudhary lim Mamitah an hâl

Mamita V/C, political party, YMA leh NGO dang zawng zawngte'n nimin aṭang khan Mamit DC Bhupesh Chaudhary sawn chhuah an phût vanga Mamit DC pisa khâr an tum avangin Bhupesh Chaudhary chu September 17, Thawhṭanni zan khan Aizawl panpui a ni. Aizawlah pawh dodalna vangin Central YMA bultumin mi eng emaw zatin an lo hmuak a, buaina a chhuak lo. Hetih lai hian, nimin khan Mamitah Bhupesh Chaudhary lim hâl a ni.

Tarlan tawh angin, Mamita V/C, YMA, political party leh NGO dangte telna Joint Committee chuan an DC Bhupesh Chaudhary chu chhan hrang hrang vangin September 17, 2018, tlai dar 5 rik hmaa sawn chhuahna thupek hmuh an phût a; sawn chhuah a nih loh chuan September 18 aṭangin Mamit DC pisa khâr an tum thu an lo puang tawh a ni.

Mamit DC Bhupesh Chaudhary chu Thawhṭanni zan khan Aizawl panpui a nih thu leh, a nupui Shushanka, IAS (FCSCA director) chenna, New Secretariat Complex-a sorkar quarters-ah hruai an tum nia an hriat avangin lo hmuak turin Central YMA ruahmanna angin Aizawla YMA branch hrang hrang hruaitute koh khawm an ni.

Central YMA president Vanlalruata hnen aṭanga thu dawn danin, YMA branch hrang hrang hruaitute chu Aizawl Tennis Court bulah leh, New Secretariat Complex luhna gate pahnih bulah an kalkhawm a, Bhupesh Chaudhary chu an lo nghak a ni. Mahse, an mi nghah chu Aizawl khawpuia luhpui loin, 5th. IR hmunpui, Lungverhah riahtir a ni dawn tih an chuan hnuah, zan dar 12 pelhah YMA member-te chu an ṭîn darh a ni.

CYMA President chuan, Mamit DC Bhupesh Chaudhary chu Mamit aṭang chauh ni loin, Mizoram aṭanga sawn chhuah an phût thu a sawi a, "Mamita an duh loh hi Aizawlah pawh kan duh bik lo a, Mizorama awm tlakah kan ngai lo a, Mizoram aṭanga sawn chhuah kan phût a ni," a ti.

Bhupesh Chaudhary chungchangah hian Vanlalruata chuan, nimin khan chief secretary Arvind Ray an hmuh thu leh la nghah deuh a ngaih mai theih thu a sawi a; Chief Secretary hian Bhupesh Chaudhary transfer-na tur an buaipui thu te, Mizoram aṭanga sawn chhuak tur chuan Mizoram sorkar thuneihna piah lam thil a awm thu leh, sorkar laipuiah sawn chhuak tura an thlen fo tawh thu a lo hrilh niin a sawi bawk.

Mamit Joint Committee ruahman angin, pawl hrang hrangte chuan DC transfer order a la chhuah loh avangin nimin zing aṭang khan Mamit DC pisa an dang a, DC Bhupesh Chaudhary lim leh Cr.PC 144 puanna thupek (order) copy an hâl nghal.

Mamit aṭanga thu dawn danin, DC office kawtah hian mi 1,000 chuang an kal khawm a, police-te nena indan buaina leh boruak duhawm lo thleng a awm lo.

Resolution pahnih an pass a; 'Mizo mipuite min tham lotu Bhupesh Chaudhary hi engti kawng zawng mahin Mamitah a lo lêt tawh tur a ni lo a, a rang thei ang berin Mizoram a chhuahsan tur a ni," tih leh, "Bhupesh Chau­dhary, Mamit DC transfer order hi a rang thei ang bera tihfel ni rawh se," tihte a ni.