World Bamboo Day hman a ni

India hmarchhak state-te'n kum tina a huhoa programme an hman ṭhin, World Bamboo Day (North East Region) chu nimin khan Mizoramah pawh R Dengṭhuama Hall-ah hman a ni a, chief minister Lal Thanhawla khuallian a ni.

Chief Minister chuan, hmarchhak state-te chu mauah an hausa tih sawiin, "Ram pum mau neih tam zawk chu India hmar­chhakah a awm a, Mizo­ram mau hi state páwnah lehkha siam chhuah­naah thawn ṭhin a, chu'ng paper mill-te chu tihtawp a nih tak hnuin mau hman ṭangkaina tur dang ngaihtuah a ṭul a ni," a ti.

Mau hralh chhuahnaah harsatna a awm ṭhin thu a sawiin Lal Thanhawla chuan, "Sorkar laipuiin environment humhalh a ṭulzia hre reng chunga ram pum leh a bik takin India hmarchhak state-te hmasawnna tura hmalak a ni hi a lawmawm hle. Hmarchhak state zawng zawng huap World Bam­boo Day lawmna hian rah ṭha a chhuah ngei ka beisei," a ti a; investor-te chu Mizoram theihna ngaihtuah chunga hlâwk tlân nan Mizoramah investment ti turin a sáwm.

Inkhawmah hian chief secretary Arvind Ray-a'n inlawmna thu a sawi a, En­vironment, Forest & Cli­mate Change secretary Lalram Thanga, DoNER secretary Naveen Verma leh NEC secretary Ram Mui­vah te pawhin thu a sawi. Kumina World Bamboo Day thupui atan 'Mau - Kan Hausakna' tih a ni.

Mizoram World Bam­boo Day (NER)-ah hian mau ṭangkaina leh ṭhatna inzirtirna hun hman a ni bawk.