Polythene hman loh nan AMC-in hma an la

Aizawl Municipal Cor­poration (AMC) commi­ssioner Dr H Lalthlang­liana chuan, plastic leh polythene aṭanga thil siam chhuahte Aizawlah hman a nih lohna atan hma an lak thu a sawi.

Dr H Lalthlangliana hian nimin khan Aizawl Press Club-ah thuthar thehdarhtute a kâwm a; plastic leh polythene aṭanga thil siamte'n khawsak a tihawlsam rual­in, a ṭawih ve mai theih loh avangin harsat­na a thlen thu a sawi a, "Zirbing mi ṭhenkhat chhût dan chuan, plastic leh polythene kan hman tuifinriata chám báng rihna belhkhawm hi kum 2050-ah chuan tuifinriata cheng sangha awm zawng zawng rihna aiin a tam thei dawn a ni," a ti.

Ram hrang hrang leh India ramah pawh plastic leh polythene ṭhat lohzia hriain, hmang tlem turin an insingsa nasa tawh tih sawiin AMC Commissioner chuan, "Supreme Court leh thuneitu sang tak National Green Tribunal chuan hma lain, state sorkar leh urban local body-te hnenah vawi tam tak hriattirna a pe a, polythene bag khap turin a ti tawh," a ti a; AMC pawhin engtikah emaw chuan polythene bag hman a la khap ngei tur thu a sawi.

AMC Commissioner sawi danin, kum 2017 khan Science Teacher Association of Mizoram (STAM)-a mithiamte ruaiin, polythene leh plastic aṭanga siam chhuahte chungchang zirchianna an buatsaih. Zirchianna aṭang hian ni tin polythene bag hman zat chu quintal 5 (kg. 500) vel a tling. Plastic lam chi thlêng, no leh fian hmante nen chuan, environment lam ngaihtuah mi tan chuan rapthlak khawpa tam a ni.

H Lalthlangliana chuan, AMC chuan, vawi leh khata polythene hman khap thut a nih chuan mipui tan a harsat dawn thu sawiin, "Awmze neia hmalak hret hret ni se kan ti. Chumi atana hmalakna hmasa ber chu 'Zirchian­na 2017'-a neih tâk kha a ni. Hmalakna kal zelah September 20-21 hian Assembly Annexe-ah 'No Plastic Exhibition, 2018' buatsaih a ni dawn. Dawr 21 a awm dawn a, 17 chu exhibition item mipui hnena thil thiam entir paha hralh nghal thei tur a ni," a ti.

No Plastic Exhibition, 2018-in a tum ber chu, plastic leh polythene lam kan hman ṭhin thlakna tur a awm em tih a nih thu sawiin Dr H Lalthangliana chuan, "Hetiang lam siam chhuaktute cho phûr a, Aizawl khawpui hman khawp siam chhuah theih a ni dawn em tih enchhinna a ni," a ti a; polythene hman khap a nih pawha harsa lutuk loa thil dang hmang thei tura mipu rilru buatsaih hmasak leh a thlakna tur lo buatsaih lâwk an tum niin a sawi.