Mizoramah HIV+ve 18,007 an tling

Mizoram State AIDS Control Society (MSACS) chhinchhiah danin, Mizorama HIV hrik pâi hmuh chhuah ṭan aṭanga kumin August thla thleng khan Mizoram pumah HIV hrik pâi 18,007 hmuh chhuah a ni tawh.

Tun hnaia HIV hluar dan (prevalance) tarlanna tihchhuah thar, India HIV Estimations 2017 Technical Report-ah Mizoram chu HIV hluarna ber state a ni.

Chawlhkar khat chhung Mizoram district pathum - Aizawl, Lunglei leh Kolasib district tlawh tura rawn zin National AIDS Control Organisation (NACO) hotute leh Mizorama HIV lama thawktute chu September 17, Thawhṭanni khan Hotel Regency, Aizawlah inkâwmin, HIV/AIDS donaa hmalak zel dan tur an sawiho a; he hunah hian Mizorama HIV/AIDS dinhmun thar ber ber an tarlang.

MSACS project director Dr Lalmalsawmi Sailo chuan, theihtawp chhuaha hna an thawh rah a la lan chhuah a beisei tih sawiin, tun hnai kum hnih chhungin Mizoramah ruihhlo heroin a luh tam avangin ruihhloa inchiuna inhman ṭâwm aṭanga HIV kai an pun thu a sawi a; HIV kai zingah nupui pasal leh kawppui nghet nei lo an tam chu hna thawh tiharsatu pakhat a nih thu sawiin, "NACO leh MSACS programme-a leng chiah lo, a rûka inchiu leh invenna tel loa mipat hmeichhiatna hmangte hi Mizorama HIV pun chhan a ni," a ti.

NACO deputy director (Tar­geted Intervention) Dr Bhawani Singh chuan, Mizorama HIV darh nasa zel veng turin NACO-in theitawp a chhuah dawn tih sawiin, tuna hmalak mekna tichak lehzual turin a taka rawn hmuh leh hna thawktute thusawi ngaihthlak an tum ber a ni tih a sawi.

Mizoram tlawh kualtu tur NACO team-te hi MSACS-a thawkte'n an ṭawiawm zel dawn a, team pali-ah an insiam. Team pakhat chuan Thawhṭanni khan Lunglei an pan a, team khat dangin nimin khan Kolasib an pan a; team pahnih chuan Aizawl district hmun hrang hrang an tlawh kual thung.

MSACS chhinchhiah danin, Mizorama HIV hrik pai hmuh chhuah ṭan hun, October 1990 aṭanga August 2018 thleng khan mipui náwlpui (general client) bika chuan Mizoramah HIV hrik pai mi 16,413 hmuh chhuah tawh an ni a, mipa 10,780 leh hmeichhia 5,633 an ni. Nu nau pai thisen endik zingah bik HIV hrik pai 1,594 hmuh chhhuah a ni bawk a; general client leh nu nau pai aṭanga hmuh chhuah zat belhkhawm chu 18,007 a ni.

General client bika HIV hrik pâi hmuh chhuah tawh mi 16,423 zinga mi 12,118 chu Aizawl district-a mi an ni a, chu chu 72.14% a tling.