Vei hmuh belh chungchang DC-in thuthar thehdarhtute a hrilhfiah

Lawngtlai DC Dr Andrew H Vanlaldika chuan nimin khan a pisaah thuthar thehdarhtute a kâwm a, an district-a Covid-19 kai hmuh belh chungchang a hrilhfiah.

Dr Andrew H Vanlaldika chuan, Lawng­tlai district-ah sorkarin inkaihhruaina hrang hrang a siamte uluk taka zawm zel a nih avang leh hripui vei pali hmuh chhuah belh­te pawh ṭha taka khung hran sa an nih avang­in mipui tan chiai phahna tur a awm lo tih a sawi a, "Covid-19 vanga damlote enkawl chungchangah leh hri dona kawngah sorkarin a tih tur ang ang hlen chhuak turin theih­tawp chhuah a ni," a ti.

Lawngtlai DC sawi danin, an district aṭang­in Zoram Medical College (ZMC)-ah RT-PCR hmanga swab test turin sample 741 thawn a ni tawh a, result hriat tawh 594 awmin, chu'ng zinga pariat chuan Covid-19 an vei a; sample 147 result erawh hriat a la ni lo.

Lawngtlai district-a Covid-19 vei hmuh chhuah tharte chu mipa pahnih leh hmeichhia pa­hnih, Delhi aṭanga haw vek an ni a, sorkar quarantine facility-a khung hran lai an ni. A hmaa hripui vei pali awm sate nen Covid Care Centre-ah dah an ni a, an hriselna dinhmun vil reng niin, ngaihtuahawm an awm lo.