Serchhipa MNF candidate tur Ramzauva

MNF president Zoramthanga chuan, kumin Assembly inthlanpuia Serchhip biala MNF candidate tur chu C Lalramzauva a nih thu a puang a; Congress party chu inthlah chhawn rorelna lak luh an tum avangin an tlachhe mek niin a sawi.

Serchhip MNF East Block huaihawta nimina Serchhip Bazara campaign hawnna inkhawmah Zoramthanga chuan, "Pu Hawla'n vai rama an hotute tih angin inthlah chhawn rorelna Congress party-ah lak luh a tum a, Congress party a leng darh ta mek. Congress chakna thahrui ber an vice president Pu R Lalzirliana chu party aṭangin an bàn ta hial a ni. Kan inthlan loh avangin Congress hi an la tla lo mai chauh a, anmahni an inbei chhe vek tawh a ni," a ti.

Zoramthanga chuan, "Congress sorkar vanga Zoram damlo a dam theihna tur in kutah a awm. Zu zuar thei tawh lo tura Congress party in siam a ngai. Kohhran mite'n ṭawngṭaia Pathian ráwn chungin vote thlak turin ka ngen a che u," a ti a; Congress sorkarin district panga an puante MNF sorkarin ṭha taka a tihpuitlin laiin, MNF sorkarin district a puante chu Congress sorkarin a ngaihsak ve lo tih sawiin, MNF sorkar hunah district pathum puan tawhte chu an tihpuitlin dawn thu a sawi.

Serchhip mipuite chu 'CM tur kan vote tling leh dawn' tih rilru pu tawh lo tura chahin Zoramthanga chuan, Lal Thanhawla a tling leh a nih pawhin MLA dang 20 an neih a ngaih avangin Congress an tling zo tawh dawn lo niin a sawi a, "India ram hmun danga Congress an chhia ang chiahin Mizoramah pawh an chhe vek mek a ni," a ti.