KHAWTHLIR

CM kutah dah
Cabinet minister aṭanga báng ta R Lalzirliana enkawl department-te chu chief minister Lal Thanhawla enkawl rih tura tih a ni. R Lalzirliana'n a enkawl ṭhin department-te chu - Home, Power & Electricity, Rural Development leh Excise & Narcotics-te a ni.

Mi 1,162 admit
August, 2018 chhung khan Aizawl Civil Hospital-ah mi 36,168 an inentir a, mi 1,162 admit an ni a; nau piang 334 leh mitthi 28 an awm. August chhung vêk hian damlo 223 chu Mizoram páwna enkawl tura thawn an ni.

Bank hawng
Mizoram Cooperative Apex Bank branch thar, Vaivakawna mi chu nimin khan minister Lal Thanzara'n a hawng. Minister chuan, loan lakte chu rulh leh ngei ngei tur a ni tih mipuiin an hriat chian a ṭul thu a sawi. Apex Bank hian nimina hawn tak nen hian Mizoramah branch 18 an nei a, Aizawl bikah chuan branch pakua an nei a ni.

MLA-in hawng
Kolasib College chuan nimin aṭang khan College Week an hmang ṭan a, week hawngtu, bialtu MLA PC Zoram Sangliana chuan, college week chu Pathianin thiamna leh theihna hrang hrang min pek pho chhuahna hun a nih thu a sawi.

MPSC CoE
Rural Development director Lalhriatpuia, MCS chu MPSC-ah Controller of Examinations atan dah thar a ni a; Lalhriatpuia hian nimin khan a hna thar hi a zawm.

School bus pe
Hindustan Petroleum Corporation Limited (HPCL) chuan corporate social responsibility (CSR) aṭangin Lengpui Presbyterian English School tan bus an leisak a, September 17, Thawhṭanni khan HPCL chief general manager Alok K Gupta-a'n Lengpui PES principal Lalmalsawma hnenah a hlan. School bus hi cheng 15 chuang man a ni.