SDIDC-in R Lalzirliana an chawimawi

Saitual District Implementing Demand Committee (SDIDC) chuan nimin khan an khaw auditorium-ah an bialtu MLA R Lal­zirliana chawimawina inkhawm an buatsaih.

Inkhawm hi SDIDC chairman Ro­hmingliana'n a kaihruai a; R Lalzirliana chuan, mipuiin an lo hmuak chu phû lo a intih thu sawiin, "In duh ang ka ti thei lo a, in mi ngaihdam ka dil a ni. District kan duh em em a, ka bialte natna hi ka natna a ni a, in ṭahna hi ka ṭahna a ni tih lantir nan minister nihna sang tak aṭangin ka báng a ni. District min pe thei tur sorkar siam turin bial mipuite kan ṭanrual a ngai," a ti.

R Lalzirliana chuan, District Reorganisation Committee-in Cabinet-a an thu thlen ngaihtuah a nih ṭumin Cabinet Minister zawng zawngin Saitual district tihpuitlin ṭha an tih thu sawiin, "Saitual bial mipui hmaa ‘Keini chuan district fuke kim kan pe ang che u’ titu chief minister Pu Lal Thanhawla chuan, ‘Ka hman lo’ tiin, a chhuak a ni," a ti a; a hnuah district chungchang ngaihtuah a ni ngai tawh lo tih a sawi.

Tun hnaiah media hmaah Chief Minister-in, 'District hi hmuia pek chi a ni lo' tih a sawi thu tarlangin R Lalzirliana chuan, "District hi hmuiin, kan káin inpek a ngai a, thu chu tisaah a chang tur a ni. INC hotu lawk pathum - Rahul Gandhi leh Chief Minister hoa kan lo tiam tawh district hi min pek ve mai ka beisei a, theihtawp ka chhuah a ni. Pu Lal Thanhawla hotu a nih chhung chu Saitualin district kan hmu dawn lo tih a chian tak avangin Cabinet Minister aṭangin ka báng a ni," a ti.

SDIDC thuchhuah tarlan danin, R Lalzirliana hi Keifangah lo hmuah a ni a, Dawrkâwna hun tawi hman a nih hnuah Saitual Auditorium-ah chawimawi inkhawm buatsaih a ni. Inkhawmah hian Ṭawi bial bakah a chhehvel hmun hrang hrang aṭangin mipui an kalkhawm.

SDIDC chuan, an ngenna anga an Bialtu MLA-in Home minister nihna a kalsan ngam chu ropui an tih thu tarlangin, "Thinlung takin lawmthu kan sawi a ni. Party aṭanga hnawhchhuah hial a tâwk ­erawh pawi kan ti a, kan tuarpui tak zet. Tun term chhung hian district kan hmu hman lo a nih pawhin, district kan neih hma chu kan kal zel dawn," an ti a; Congress party chu DC tel lo chuan an bialah candidate siam lo turin an chah nawn a ni.