NRC chungchanga sorkar hmalakna Vairengte YMA-te'n a him tâwk lo an ti

Vairengte khuaa YMA branch hrang hrangte chu tunlai hian Assam aṭanga Mizorama hnam dang luh tumte enfiahin ngawrh takin an duty ṭhin a, Assam National Registration of Citizens (NRC) list-a tel lo mi tam tak an man chhuak tawh. Vairengtea YMA hruaitute chuan, Assam aṭanga Mizorama rawn lut tur hnam dang, a bikin NRC-a chuang lote danna tura Mizoram sorkar hmalak dan chu a him lo hlea an ngaih thu an sawi.

Vairengtea YMA hruaitute hnen aṭanga thu dawn danin, Assam aṭangin NRC list-a tel lo foreigner tam tak Mizoramah luh an tum tih hriat a nih avangin Vairengte Joint YMA ruahmanna angin an khuaa YMA branch hrang hrangte chu an in duty chhâwk ṭhin. Duty hi September 9, 2018 zan aṭang khan an ṭan a, ni tin YMA branch pahnih zel an duty a, ni khata branch pahnih duty-te chu a chángin chhun leh zanah chan an insem a, a changin a huhoin an duty bawk.

Vairengte YMA hruaitute chuan Vanglaini palai zawhna chhangin, Vairengte police-te chuan hnam dang Mizorama lut turte chu Inner Line Permit (ILP) chungchang bikah an endik a, YMA duty-te chuan NRC list-a an tel leh tel loh an lo endik ve thung tih an sawi a, "Ni khatah hian chhun lamah vai 200-300 vel an rawn lut a, zanah 500-800 vel an rawn lut bawk a, Mizorama luh tum an tam lutuk hi a manganthlak hle a ni," an ti.

Assam aṭanga Mizorama vai rawn lut zingah Assam NRC-a chuang lo an hmuhchhuah dan zawhna chhangin YMA hruaitute chuan, NRC nei lo luh tum an tam thu leh an man chhuaha an lettir pawh an tam thu an sawi a; "Mobile phone-ah NRC list kan download a, chumi hmang chuan kan endik ṭhin," an ti. Motor 20 chuangte an inhnawh khawm ṭhin avangin motor mal mal uluk taka endik sen a nih loh thu leh, truck hnung vela biru pawh an awm ṭhin thu an sawi.

Assam NRC-a chuang lo (foreigner) Mizorama luh tum dan kawnga Mizoram sorkar leh police hmalakna a ṭha/him tâwk em, tih zawhna chhangin Vairengte YMA hruaitute chuan, "A him lo tawp. YMA branch hrang hrangte hian a him lo-ah kan ngai vekin ka hria. Vai rawn lut zingah mi NRC kengte kan man chhuak a, ILP sponsor tu hming leh phone number awm lote a tam hle. Sponsor-tu hmingah hming phel inang, Mawii tih tawpte a tam hle a ni," an ti.

Vairengte YMA hruaitute chuan, Police checkgate-a temporary ILP pek chhuah chungchangah, "Tuna an kalpui danah hi chuan, sorkar sum siamna chi khat ang chauh a ni," an ti.

Temporary ILP chu ni sarih (chawlhkar khat) dam a ni a, la chhuak turin pakhatah Rs. 130 sen a ngaih thu leh, temporary ILP diltu zinga tam tak chu hmun hla tak tak - Lunglei, Siaha leh Lawngtlaia awm turte an nih avangin, an temporary ILP leh ILP pangngai an neih leh neih loh en zui a ngai hlea an hriat thu an sawi bawk.