KHAWTHLIR

Mizoram University (MZU)-a thuneitu sang Executive Council Meeting chuan MZU pro vice chancellor atan Department of Political Science-a mi Prof. JK Patnaik an ruat. Prof. JK Patnaik hi Canada aṭangin Ph.D (Queens) a zo a, research scholar leh civil service lama kalte tana lehkhabu râwn hlawh tak 'Mizoram: Dimension and Perspective' tih ziaktu a ni.

July 4, Inrinni khan Salvation Army Youth, Central South Division chuan Salvation Army Foundation Day vawi 66-na pualin Aizawl Temple Corps Centenary Hall-ah blood donation camp an huaihawt a, mipa 93 leh hmeichhia 22-te'n Aizawl Civil Hospital tan thisen unit 115 an pe. Leitan Ramthar Branch KṬP pawhin Synod Hospital tan unit 13 an pe a, petute mipa 12 leh hmeichhia pakhat an ni.

Kolasib DC Dr H Lalthlangliana hoa Sa Zuar Association, Kolasib District Consumer Union, khaw­tlang hruaitute sorkar official-te July 3, 2020-a ṭhukhawm chuan an district chhunga hman turin sa man an bithliah. Sa man thar chu kg. khat zelah - bawngsa Rs. 500 (a tî/a ir), Rs. 600 (a thin), Rs. 400 (a ruh), Rs. 300 (a kawchhung), arsa (broiler) puah sa Rs. 300 leh puah loh Rs. 200, tualchhung sangha Rs. 350 leh phai sangha Rs. 300 a ni.

July 3, Zirtawpni chawhnu dar 1:30 vela Thenzawl leh Buarpui inkar Tlawng luia tla hlum Lalnunsanga (19) s/o Lalthanglawta, North Khawlêk chu July 4 chhun dar 12:20 khan a tlakna aṭanga lui mawng lam ft. 200 vela hláah hmuh a ni. Lalnunsanga hi Tlawng lei dawh mek bulah inhlawhin a ṭhiante nen an riak a, luia an inbual laiin chesualin a tla a; Thenzawl, New Khawlêk, Khawlêk, Déngsur leh Buarpui khaw mi ṭhahnem takin an zawng a ni. Ruang zawngtute tan CM Zoramthanga leh speaker Lalrinliana Sailo ten ṭanpuina an pe.