Tender chhuah ṭha turin sorkar phût 'Cheng vbc. 41 a riral dawn' - ZPM

ZPM party chuan, Aizawl Smart City project hnuaia CCTV system (Integrated Control and Command Centre - ICCC) dah tura hmalakna kal mekah cheng vbc. 41 vel chu tute'n emaw an fanghma no ei vangin a rîral ngei dawna a lan thu tarlangin, tender chhuah ṭha turin sorkar an phût.

July 4, Inrinnia ZPM thuchhuah tarlan danin, Ministry of Urban and Housing Affairs aṭanga sum lo kal, Aizawl Smart City project hnuaia Aizawla CCTV dah turin Bharat Electronic Limited (BEL) hnenah contract cheng vbc. 101.02 man pek a ni a, hna hi BEL chuan thawk loin, cheng vbc. 60-a hralh chhàwn tumin tender an chhuah mek. Tender an chhuah anga mi dang hnena hna an pek chuan cheng vbc. 41 chu an fanghma no ei dawn a ni.

BEL-in tender an chhuah chu a chhángtu tu pawhin changin thawk dawn se, hna thawhna tur hmanrua - khawl leh bungrua zawng zawng leina tur company thlenga ruatsakin tender-ah tarlan a ni a, chu'ng zingah chuan China company Hikvision, Infinova leh CPPlus-te an tel. India sorkarin China bungrua tam tak a 'boycott' laia China company siam hmanruate lo hman chu ngaihtuah chian a ngai hle-ah an ngai.

Belgavi, Agar, Namchi, Delhi leh hmun dangahte hna an thawh chhiat avangin BEL chu an hmingchhe hle a, Belgavi-ah chuan Aizawla an tih dan ang bawkin mi dang hnenah an hralh chhâwng a, a hunah an zo thei lo. Delhi-ah pawh a hun taka hna an zawh loh avangin sorkarin cheng vbc. 16 chawitir a tum mek a ni.

Ministry of Urban & Housing Affairs chuan BEL chu public sector undertaking (PSU) a nih angin a duhsak a, state leh union territory-te chu contract pe turin a recommend a, chu'ng zingah chuan Mizoram pawh a tel. Ministry ngenna chu state leh UT-te'n an zâwm ngei ngei tur tihna a nih loh avangin state ṭhenkhat chuan contract pe kher loin open tender an chhuah fo. Assam leh Meghalaya chuan BEL an thawhpui duh lo a, Assam-in tender a chhuah ṭha tawh a, Meghalaya-in tender chhuah a tum mek bawk.

ZPM chuan, Mizoram sorkarin sawisel nei loa an duh ang anga BEL an tâltir chu ngaihṭhat thlak loh an tih thu sawiin, hna thawh chhiat vanga an hmingchhiat hle laia Aizawl Smart City project hnuaiah hlâwk uchuak taka BEL-in contract an la hmu thei chu mak an tih thu an tarlang a; "Mizoram sorkara a fawng chelhtute'n sum siam tumna an lo nei a nih chuan inthiar fihlîm vat se. PSU hmingṭha tak ni lo hnena pek ngawt ai chuan tender chhuah ṭhat leh ni rawh se," an ti.