HIV hrik kai chhan 66.68% - sex ; Thla 9 chhungin HIV+ve 1,772 hmu chhuak

Mizoram State AIDS Control Society (MSACS) chhinchhiah danin, Mizorama HIV hrik pâi hmuh chhuah zat chu August 2018 thleng khan mi 18,007 an ni. Mipui náwlpui (general client) zingah HIV hrik kai chhan tam ber chu mipat hmeichhiatna hman sual (heterosexual) niin, 66.68% an tling. Tun hnai thla 9 chhungin Mizoramah HIV vei hmuh chhuah thar mi 1,772 an awm.

MSACS chhinchhiah danin, Mizorama HIV hrik pai hmuh chhuah ṭan hun, October 1990 aṭanga August 2018 thleng khan general client zingah HIV hrik pai mi 16,413 hmuh chhuah tawh an ni a, chu'ngte chu mipa 10,780 leh hmeichhia 5,633 an ni.

Nu nau pai thisen endik zingah bik HIV hrik pai 1,594 hmuh chhhuah a ni bawk a; general client leh nu nau pai aṭanga hmuh chhuah zat belhkhawm chu 18,007 a ni.

General client bika HIV hrik pâi hmuh chhuah tawh mi 16,423 zinga mi 12,118 chu Aizawl district-a mi an ni a, chu chu 72.14% a tling.

HIV hrik kai zinga mi 10,945 (66.68%) chu mipat hmeichhiatna aṭanga kai an ni a; chu'ngte chu mipa 6,299 leh 4,646 an ni. Mahni anpui kawpna aṭanga kai mi 151 (0.92%) an ni a, mipa vek an ni. Hriat hman aṭanga kai mi 4,500 (27.42%) awmin, nu aṭanga kai mi 508 (3.10%) an awm a, kai chhan hriat chian loh mi 309 (1.88%) an awm bawk.

General client zinga HIV hrik pai zingah hian kum 50 chung lam mi 815 an awm tawh a, chu'ngte chu mipa 538 leh hmeichhia 277 an ni. Naupang, kum 14 hnuai lam 548 (mipa 265 leh hmeichhia 283) an awm.

MSACS chhinchhiah danin, November 2017 thlenga Mizorama HIV+ve hmuh chhuah tawh zat chu mi 16,235 an ni a, chutih laiin, August 2018 thlenga hmuh chhuah zat chu mi 18,007 an ni.

December 2017 aṭanga August 2018 (thla kua) chhungin HIV+ve hmuh chhuah thar mi 1,772 (18,007 - 16,235 = 1,772) an awm tihna a ni. Chawhrualin, thla tin HIV+ve hmuh chhuah thar mi 196.89 vel an awm a; ni tin mi 6.56 hmuh chhuah thar an awm ang a ni.

General client bikah, December 2017 aṭanga August 2018 (thla 9) chhung khan HIV+ve hmuh thar mi 1,659 an awm a; nu nau pai bik zingah mi 113 an awm bawk.

Hetih lai hian, nu nau pai bik zingah August 2018 thleng khan thisen endik mi 2,32,739 zinga 1,594 (0.7%) chuan HIV hrik an pai tih hmuhchhuah a ni a; sorkar kum kal mek 2018-19 chhungah August thla thleng khan nu 8,093 endik zinga 100 (1.2%) chu HIV+ve an ni tih hmuh chhuah niin, kum 14 chhunga nu nau pai zinga HIV+ve hmuh chhuah percentage a san ber kum a la ni rih.

Nu nau pai bik a hranpaa HIV hrik an pai leh pai loh hre tura thisen endik hi kum 2004 aṭangin kalpui ṭan a ni a; a ṭan kum, 2004-05 chhung khan nu 22 enfiah zinga pakhat chu HIV+ve niin, hei hi percentage ang chuan a san ber kum a ni.