Inthlan hun turah thu thar la awm lo

Mizorama Election depart­ment hotute chuan, Mizoram Legislative Assembly inthlanpui neih hun tur chungchangah Election Commission of India (ECI) aṭangin thu leh hla engmah an la neih loh thu an sawi.

Vanglaini palai zawhna chhangin Election department hotute chuan, ECI hotute Mizorama an rawn zin hun an ngaihchân reng thu an sawi a, "ECI hotute an rawn zin ang a, kan inbuatsaihnate ṭha tâwka an ngaih chuan inthlan an puang mai turah kan ngai. Kan inbuatsaihna chu a ṭha tawkah kan ngai a, kan inring tâwk ve hle. Mahse, ECI lam hian an rawn zin hun tur an la sawi lo," an ti.

Election deptt. hotute chuan, ECI duhdan angin Mizoram Electoral Roll Revision neih mekah final roll chu October 17, 2018-ah târ chhuah hman a nih dawn thu sawiin, "October 17-ah hian târ chhuah hman ngei ngei a ngai," an ti a; October 17-a tár chhuak hman ngei turin an inbuatsaih thu an sawi.