MHSA-in inkhawmpui an hmang

Mizoram Horticulture Service Association (MHSA) chuan, nimin khan Horticulture conference hall-ah inkhawmpui an hmang a, Horticulture secretary Rodney L Ralte-in a hmanpui.

Inkhawm hi MHSA president Vanlalruata Chenkual-in a kai­hruai a; Rodney L Ralte chuan, Horticulture chu department te­reuhtê ni ṭhin mah se, tunah chuan major department a nih tawh thu sawiin, "Department ṭhan chak chhan hi thawktute inlungrualna vang a ni. Chutihrualin, thâ thlah loa inpekna nena theihtawp chhuah zel a ngai," a ti.

Horticulture director Dr Elizabeth Saipari chuan, Horticulture officer tharte chu huan nei vek turin a chah a, "Centre-a awm pawhin hmun ruak zawng r'u. A taka kan tih ve ṭhin zel avangin hlawhtlinna kan chang. A taka kan tih ve hian kan tawnhriatin lo neitute a pui a ni," a ti a; mahni hnaah theihna zawng zawnga inpek tur a nih thu a sawi.

MHSA hi kum 1994-ah din a ni a, nimin khan member thar 11 lawm luh niin, member 81 an awm a ni.