Lirnghinga in chhia neitute ṭanpuina pe

Champhai DC Maria CT Zuali chuan July 4, Inrinni khan tun hnaia lìrnghîngin chhiatna a thlenna khua zinga mi, Khawbung RD Block chhunga Khawbung, Khuangthing leh Zawlsei khuate a tlawh a; chhungkaw 26-te tlawh kualin, Disaster Management & Rehabilitation department aṭanga chhawmdawlnate a hlàn.

Maria CT Zuali chuan, lirnghing tuarte thinlung taka a tawrhpui thu sawiin, an chincháng sorkarin a ngaihven reng thu a sawi a, "In leh lo chhia ṭanpuina leh chhawmdawlnate hi in chhia siamṭhatna khawp tling lo mah se, sorkarin a tawrhpuizia lantirna leh inkaihhruaina awm sa zûlzuia siam a ni," a ti.

Sorkar thuchhuah tarlan danin, Khuang-thingah chuan chenna in chhe zuala ngaihah  chhungkaw pakua an awm a, a chhe nêp deuha ngaihah chhungkaw pakua bawk an awm. Zawlseiah in chhe zuala ngaih pathum leh chhe nêp deuha ngaih panga a awm bawk. In chhe nasa zual neitute hnenah Bawrhsap chuan Rs. 15,000 ṭheuh leh chhe nêp deuh neitute hnenah Rs. 5,200 

ṭheuh a hlan a ni.

Champhai DC chuan, Khuangthinga Lalliansanga in, a bang chim lek lek tawh chu chhiatna dang a thlen theia hriat a nih avangin ṭhiahna tur thupek a chhuah a; Khawbunga Thangphunga in, cement concrete building, a ban pariat khi chat kual vek tawh chu a hmunah a en a, Khawbung Village Level Disaster Committee hotute nen an inkâwm bawk. Champhai Bawrhsap hi district-a sorkar hotu dangte'n an ṭawiawm a ni.