Cash Incentive Award sem leh dawn

Mizoram Youth Commission (MYC) Cash Incentive Award Committee hotute chu nimin khan chairman Joseph Lalhimpuia, MLA hoin a pisaah an ṭhu a; Cash Incentive Award sem leh ngei ni se, tiin thu an dah a, award chu category pali-ah ṭhen an rél.

MYC Incentive Cash Award Committee-in category an ṭhen dan chuan, category-1 ah all India services leh Central Services Rules-in a huam chin an tel dawn a, chu'nga inziak tlingte chu Rs. 2,00,000 pek an ni dawn.Category-II ah UPSC-in exam a conduct zawng zawng a huam dawn a, chuta tlingte chu Rs. 1, 00,000 pek an ni ang.

Category-III ah chuan UPSC ni lo, group A & B, semi-government leh international, national reputed entrance examination/scholarship-a tlingte an awm dawn a; inziak tlingte chu Rs. 50,000 pek an ni ang. Category-IV ah chuan zirna sang (academic) lama mi chungchuangte dah an ni a, chutiang mite chu Rs. Rs. 40,000 pek tura tih a ni.

Cash Incentive Award hi June 26, 2018 khan Chief Minister-in a lo sem tawh a; nimina meeting-in a rel, award pek leh tur hian April 1, 2018 aṭanga March 31, 2019 thleng a huam ang.