Bru chhungkua 26 an rawn kîr belh

Tripura relief camp-a Bru chhungkaw 26 chu September 18, Thawh­lehni khan Mizoramah hruai kír an ni a, nimin khan an awmna hmun tur Lunglei district panpui an ni.

Home department hotute hnen aṭanga Vang­laini thu dawn danin, Bru chhungkaw 26-te hi Tripura sorkar official-te'n Mamit thleng an kalpui a, Mamit aṭangin an awmna tur district, Lungleia sorkar official-te'n an awmna hmun turah an hruai ve thung.

Ministry of Home Affairs (MHA) official-te chuan, Bru hruai kîr chungchang an buaipui a, ruahmanna an siam­fel hnuah Mizoram sorkar an hriattir a ni. Tun dinhmunah chuan Mizorama hruai kîr tur an la awm leh awm loh hriat a la ni lo a, lak let an nih theihna atan MHA-in hma an la chhunzawm zel.

Tripura relief camp-a Bru-te lak lêt hna August 25-27 2018 chhungin thawh a lo ni tawh a, chhung­kaw pathum hruai kîr niin, Lunglei district-ah chhungkaw pakhat leh Kolasib district-ah chhung­kaw pahnih dah an ni.

Mizorama kîr duh an tlem avangin MHA joint secretary (NE) Satyendra Garg hoin September 10, 2018 khan Aizawlah Mizoram sorkar offcial, relief camp-a Bru pawl aiawhte leh Mizorama Bru aiawhte'n meeting an nei a, Bru lak let chhunzawm leh an rêl.

Meeting-ah hian relief camp-a awm Mizorama kîr duh Bru aiawhte chuan hruai kîr an nih hmain an chenna in tur sak lâwk an duh thu an sawi a, remtihsak an ni. Lak let an nih hnua in sak ṭanpuina an dawn tur Rs. 50,000 chu an kîr hmaa in sakna atan pek lâwk an ni.

Tripura relief camp-ah hian Bru chhungkua 5,407 an awm ṭhin a, Thawhlehnia mi 26 hruai kîr an nih bakah, a hmain chhungkaw pathum an kîr tawh avangin, chhungkua 5,378 an awm meka ngaih a ni.