KHAWTHLIR

IAS-ah kai
Mizoram Civil Service (MCS) officer, R Lalramnghaka, Land Revenue & Settlement secretary ni mek chu Indian Administrative Service (IAS) pek a ni. Hemi chungchangah hian nimin khan Ministry of Personnel, Public Grievances & Pensions hnuaia Department of Personnel & Training-in order a chhuah. IPR deputy director C Lalnunkima, MIS chu nimin khan MIS Junior Administrative Grade (JAG)-ah kaisang bawk a, IPR joint director hna a chelh ang.

Thisen pe
DIET, Lawngtlai zirlaite chuan nimin khan Lawngtlai District Hospital tan thisen unit 31 an pe a, a petute mipa 16 leh hmeichhia 15 an ni. Mizoram Law College NSS unit leh Red Ribbon Club-te pawhin nimin khan an college-ah blood donation camp an nei a, mipa 22 leh hmeichhia pakuate'n Aizawl Civil Hospital tan thisen unit 31 an pe.

Damdawi-in hawng
Rabung damdawi-in (primary health centre) building thar chu September 18, Thawhlehni tlai khan bialtu MLA TT Zothansanga'n a hawng. Building hi Special Plan Assistance sum nuai 125.55 hmanga sak a ni a, June 30, 2016-a sak ṭan, January 6, 2018-a sak zawh a ni. Nau neihna pindan, zai tenau tihna, doctor ràwnna, medical store & dispensary room, sterilisation, laboratory, dark room, x-ray room, casualty room, nurse station leh female & male ward-te a awm.

Bus tlan dan
Traffic SP chuan thupek chhuahin, Sihphir-a city bus tlan dan tihdanglam a ni. Ruahmanna thar ang chuan, Sihphir bus, Bawngkawn-Chanmari kàwn via Chaltlang chu zing dar 6 aṭanga dar 8:30 inkarah chauh tlan phal a ni ang a; zing dar 8:30 hnu lamah chuan Bawngkawn aṭangin Ramhlun lamah kalin, Chanmari kawnah kualin Chaltlang lama a tlan ṭhin ang.

Office hawng
Mamit Field Venga Cooperative Societies Assistant Registrar office thar chu September 18, Thawhlehni khan Cooperation minister Vanlalawmpuii Chawngthu-in a hawng. Minister chuan, mipuite'n sorkar khalh ngil tura an pawimawhna an hriat a pawimawh thu a sawi a; ram leh hnam tana theihtawp chhuaha ṭang tlang turin mipuite a sáwm.