Hnam zia pho lang zawnga hmalak a ṭul - Governor

ICFAI University-a Department of Political Science leh Mizoram sorkara Planning department chuan nimin khan ICFAI University-ah ‘Tri-National Conference of India, Bangladesh and Myanmar on Regional Cooperation through Mizoram’ an buatsaih a; Governor Kummanam Rajasekharan-a'n a hmanpui a, hnam zia pholang zawnga hmalak a pawimawh thu a sawi.

Larsap chuan, ram pathuma mite intawh khawmna chuan ram insumdawn tawnna, ram venhim leh ruihhlo tawlh chungchangah sawihona remchang a siam tur thu sawiin, "Hnam zia thila ṭhenawm ramte nen inzawmna tam tak a awm. Hnam zia pholang thei zawnga hmalakna hian inlaichìnna ṭha zawk a siam dawn a ni. Conference-a thil sawihote hian thawhhona ṭha nei tura thutlukna leh ngaihtuahna thar a hrin chhuah a rinawm," a ti.

India hmarchhak bialin India ram mai bakah, Asia chhimchhaka ramte tan hmun pawimawh tak a luah thu sawiin Governor chuan, "Ei leh bar, eizawnna siam, industry din chungchangah leh hmasawnna hrim hrima ram dangte a la phak lo. Kum 1990-a India economy siamṭha tura hmalaknate'n a nghawng phak loin ka hria. Helai ramte tihmasawn tura ngaihtuahna thar kan sen a ngai a ni," a ti.

Khualzahawm, Planning minister Lalsawta pawhin thu sawiin, conference chuan ram pathumte inkarah thawhhona ṭha nei thei tura remchanna a siam a rin thu a sawi a, "Ram a rálmuan chauhin hmasawnna hna thawh theih a ni. Ṭhenawm ramte nena inrem taka khawsak a pawimawh. Remna hnuaia insumdawn tawnnate'n hmarchhak bial tan ṭhatna a thlen dawn a ni," a ti.

Inkhawmah hian Assistant High Commissioner of Bangladesh Dr Shah Mohammad Tanvir Monsur leh India ambassador hlui Gautam Mukhopadhyaya te pawhin thu an sawi a; thupui pahnih hmangin panel discussion a awm.

Discussion pakhat zawk, 'Trade & Investment' chungchang chu chief information Ccommissioner Lalduhthlana'n a kaihruai a; BIMSTEC director Han Thein Kyaw, Mizoram Commerce & Industries secretary Zothankhuma leh EXIM Bank regional head Pradeep Kumar Baitha ten presentation an pe.

'Culture & Poltics' tih chungchanga discussion chu Higher & Technical Education secretary Ashish Kundra-in a kaihruai a;

Mizo Award 2017 dawngtu Prof. Joy LK Pachuau (JNU), Prof. Jangkhongam Doungel (MZU), Centre for Southeast Asian Studies, Jindal School of International Affairs executive director Dr Nehginpo Kipgen ten presentation an pe bawk.