Remsiami thil petute hnenah lawmthu sawi

Hockey Mizoram hruaitute chuan nimin khan Aizawl Press Club-ah thuthar thehdarhtute an kâwm a; Asian Games 2018-a silver medal dawngtu, India women's hockey team-a mi Lalremsiami, Kolasib hnena thilpek petu zawng zawngte hnenah lawmthu an sawi.

Hockey Mizoram president Hmingdailova Khiangte chuan, Mizoram sorkarin Lalremsiami cheng nuai 10 pek a nih tur thu a puang chu ropui an tih thu sawiin, "Kan state sum dinhmun harsa tak kara heti zat an rua­hman thei hi kan lawm tak zet a ni. Hei bakah hian, Falkland Venga RAY Project Housing-ah pawh chenna in tur individuall housing unit pakhat chu a pual­in dah a ni a, kan lawmpui tak meuh meuh a ni," a ti.

Hmingdailova Khiangte chuan, Lalfamkima, Kolasib College Vengin Lalremsiami lawmpui nan a nu leh pa hnenah Rs. 20,000 a pek thu sawiin, "Hei mai bakah hian panga pangaa hockey khelh theihna tur ram a thlawnin Hockey Mizoram min pe a, Lalremsiami Hockey Ground tih a phuah nghal a ni," a ti a; ground puitlin theihna atan sorkarin hma an laksak nghal an beisei thu a sawi.

Hockey Mizoram hruaitute sawi danin, Lalremsiami hlawh­tlinna chan avangin Kolasib DC Dr Arun T chuan Lalremsiami te in panna kawng leh an in panna kawnga street light siamṭha turin hma a la nghal a ni. Lalrem­siami hi North Eastern Council (NEC)-in Rs. 5,00,000 leh Mizoram Youth Commission-in Rs. 1,00,000 an pe dawn bawk.

Hockey Mizoram hruaitute chuan, Lalremsiami bakah hian hockey-ah Mizoramin international player pakua an neih thu sawiin, "Aizawl chhung ngeiah hian hockey ground nei thei ila, national tournament-te thleng ve thei ila, kan ṭhalai hockey khel thiam inkhelte a hmunah emaw TV-ah live-in en ve thei sela, hockey hi Mizote game a nihzia zêp rual loin a lang ngei ang," an ti.

Mizoramin international player a neih tawhte
1. Lalsiammawii (L), Keifang
2. Rosalind Lalchhanhimi, Durtlang (Railways)
3. Lalremruati, Saitual/Ramhlun (Railways)
4. Lalrothuami, Mamit (NIS Hockey Coach, Thenzawl)
5. Ramngaihzuali, Lunglei (Railways)
6. Lalruatfeli Hnialum, Olympian 2016, Lungleng South (Railways)
7. Lalhlunmawii, Thenzawl
8. Lalremsiami, Kolasib
9. Lalrindiki, Hnahthial