Health care scheme thar sawiho

Mizoram State Health Care Society (MSHCS) Governing Board chu nimin khan chief minister Lal Thanhawla hoin CMO conference hall-ah an ṭhukhawm a; health care scheme thar chungchang an sawiho.

Meeting-a tarlan danin, khawsak harsa zawkte damloh nikhuaa inenkawlna sorkarin a chhawm­dawlna scheme, Rashtriya Swasthya Bima Yojana (RSBY) hman mek chu sorkar laipuiin Pradhan Mantri Jan Arogya Yojana (PMJAY) tiin a thlak dawn. PMJAY hian RSBY hnuai­a inziak lut tawh sate leh Rural Development SECC (Socio Economic Caste Census)-in mi harsa zual (deprived criteria)-a a dahte a huam nghal dawn a ni.

Meeting chuan, state sorkarin chhungkaw khawsak pangngai - above poverty line (APL) chhungkuate tana Mizoram State Health Care Scheme (MSHCS) a siam chu PMJAY nen thlun zawm ni se, an ti.

PMJAY hnuaiah hian Rs. 5,00,000 thleng damdawia inenkawlna senso bill theih a ni dawn a; MSHCS hnuaiah Rs. 3,00,000 thleng bill theih ṭhin a ni. MSHCS hnuaiah hian natna khirh zual (critical illness) chauh bill phal a ni ṭhin a, PMJAY hnuaiah erawh chuan zau zawkin, natna chi hrang hrang 1,395 chuangah bill phal a ni tawh dawn.

MSHCS hnuaia chhungkaw member panga chin tan bill theih ni ṭhin chu PMJAY hnuai­ah chuan chhungkaw member bill phal zat bithliah a awm tawh dawn lo a ni.