Tablabagh-a BSF hotu sawn chhuah phût

Tlabung Sub-Division huam chhunga Tablabagh khawtlang hruaitute leh Tlabunga pawl ṭhenkhat hruaitute September 18, Thawhlehnia Tlabung Branch YMA Rûna ṭhukhawm chuan, Tablabagh-a Border Security Force (BSF) border out post (BOP) ṭhutchilhtu assistant commandant Anil Nayak chu rang taka sawn chhuah an phût thu an tarlang.

Pawl hrang hrang hruai­tute chuan, Anil Nayak chêt danin ramria mipuite nun a tirálmuang lo nia sawiin, thla hnih vel liam taa a hna a zawm hnuah BSF leh mipuite inkara thawhhona ṭha tak awm ṭhin chu a chhe tawh hle niin an sawi a, "Uniform inbel loin hnehsawh leh chaldelh takin mi a ṭawng khum ṭhin a, thu zawhfiah tur a neih chhuanlamin BOP-ah a hmuh remchan apiang a koh ṭhin a ni," an ti.

Tun hnaiah election thila ramria kal sorkar official ṭhenkhat chu thamlo takin a ṭawng khum nia sawiin, "Tun hnai tho khan amah avangin ramri-ah silai a puah phah a, mahni hman tur thing leh mau tawlhtute pawh a mansak zel ṭhin laiin, amah zawk chu Bangladesh lamah a kai fo a ni," an ti a; Kristian missionary ṭhenkhat pawh an rawngbawlna zah lo zawngin a ṭawng khum ṭhin niin an sawi.

Tablabagh leh Tlabung­a pawl ṭhenkhat hruaitute chuan, Anil Nayak-a chêt dan chu an kham thu leh sawn chhuah vai ni se an duh thu, Tlabung SDPO hnenah an lo thlen tawh a ni. BSF leh mipuite inkar a chhiat zel lohna turin Tlabung area aṭanga rang taka sawn chhuah an phût a; sawn chhuah a nih loh chuan kawngzawh an tum thu an puang a ni.