KHAWTHLIR

Nimin khan chief minister Zoramthanga hoin MLA 15-te'n an MLA-LADS fund aṭangin CM Relief Fund-ah cheng nuai 25 ṭheuh an thawh. MLA fund thawhtute chu - Zoramthanga, Lalrinliana Sailo, Dr R Lalthangliana, Lalchhandama Ralte, Lalruatkima, TJ Lalnun-tluanga, Robert Romawia Royte, Lalrintluanga Sailo, C Lalmuanpuia, Prof. F Lalnunmawia, H Lalzirliana, Vanlalhlana, C Lalsawivunga, VL Zaithanzama, Lalchhuanthanga leh Dr Vanlalthlana te an ni.

Synod Mission Board hnuaia Basra khuaa missionary thawk mek Baby Lalrintluangi (28), Bâwktlang, Ser­chhip district chu June 17, Nilaini chawhma dar 11 vel khan Siliguri-ah a thi a, a ruang chu nimin khan Mizoram thlenpui a ni. Baby Lalrintluangi hi SMB-in contract-a missionary hna thawk turin kum 2018-ah a la a, Siliguri Mission Field hnuaia Basra khuaah evangelist hna a thawh mek laiin, June 16 zanah lu ná leh luak vangin a buai a, June 17 chawhmaah a thi ta a ni.

NSS State Office huaihawtin nimin khan Aizawla zirna-in hrang hranga NSS unit-te'n Aizawl Civil Hospital-ah thisen unit 34 an pe a, mipa 23 leh hmeichhia pakhat an ni. Thisen petute hi College of Vete­rinary Science 

aṭangin mi 15, Chal­tlang Higher Secondary School aṭangin mi 14 leh Women Polytechnic aṭangin mi panga an ni.

Chhiahtlang Village Council member mi paruk leh VC secretary-te chuan thla thum chhunga lawmman an lakte chu Covid-19 laka invenna tura ramria duty mekte ṭanpui nan nimin khan YMA Sub-Hqrs, Ser­chhip hruaitute hnenah an hlàn. Chhiahtlang VC vice president Khuanghnuna'n Serchhip YMA Sub-Hqrs. president R Sanghmingthanga hnenah a hlan a ni.