Minister 2-in Serchhip leh Hnahthial tlawh

Minister pahnih - Dr R Lalthangliana leh Robert Romawia Royte te chuan July 4, Inrinni khan Serchhip leh Hnahthial an tlawh a; Serchhip District Task Force on Covid-19 hruaitute meeting an neihpui bakah, hmasawnna hna thawh turte an en.

District Task Force hruaitute nen an inkawmnaah Health Minister chuan, Covid-19 dona kawngah mahni zâwnah mi tin rim takin an thawk tih sawiin, "Kohhran, tlawmngai pawl leh mimalin nasa takin sorkar an thawhpui a ni. Kan thawhrimnate chu Pathianin mal a sawm a, a vei mekte pawhin dam taka an chhuahsan thuai beisei theihin kan dinhmun a hahdam a, a lawmawm em em a ni," a ti.

Dr R Lalthangliana chuan, Chief Minister ruahmannain Covid-19 enna khawl Truenat Quattro chu district tina dah vek turin chak taka hmalak a nih thu sawiin, "Rei lo têah district tinin Covid-19 test-na kan nei thuai dawn," a ti a; TrueNat khawl chu Covid-19 lèn tawh loh hnuah pawh natna dang chi 16 endik theihna a nih dawn thu a sawi.

Health department-a thawktu indaih lohna nasa tak awm mekte tihziaawm tuma hmalakna a awm mek laiin, Covid-19 hripui a léng tih sawiin R Lalthangliana chuan, "Thawktu indaih lohna nasa tak hi sorkar chuan a hria. District thar pathuma district hospital sakna turte pawh a theih anga hmalak zel a ni," a ti.

Robert Romawia Royte chuan, Covid-19 laka invèn nan inkhàrkhip avangin rei tak hna thawk thei loa mipui an awm avangin hmanhmawh a ṭul zual tih sawiin, "Hmasawnna sum tam zawk Mizoramin a hmuh zel theih nan leh sumin miretheite a thlen theih nan sorkar a kal chak a ṭul," a ti a; sum hmuh hmasakte hman ṭangkai vat a nih theih nan Covid-19 karah pawh contractor thlangin work order tihchhuah zung zung a ṭul thu a sawi.

Sports Minister chuan, Mizoram Sports Policy zûlzuiin Hnahthialah infiamna ruhrel ṭha siam a pawimawh tih a sawi a, "Football field-a phùl lem phah hna pawh kumin 2020 chhunga zawh hman beisei a ni," a ti. Minister pahnih hian an department chan hnuaia hmasawnna hna thawh tur hrang hrangte an en nghal a ni.