Congress-in minister hlui thite an ui

6th July, 2020

Mizoram Pradesh Congress Committee (MPCC) chuan July 4, Inrinni khan thuchhuah siamin, Mizoram Legislative Assembly speaker leh minister hlui Rokamlova (80) leh minister of state hlui F Lawmkima te chu an ui thu leh Mizoram tan chànna nasa tak a nih thu an tarlang.

MPCC chuan, July 1, 2020-a thi ta Rokamlova chu an ui tak zet thu tarlangin, "Pu Rokamlova hi Mizoramin kum 1986-a inremna a neih theih nana thawh hlâwk tak a ni a, Congress ministry-a minister leh MLA a nihna bakah, zirtirtu ropui tak a nihna te, rawngbawlna lam thlengin Mizoram tan hna ṭangkai tak tak a thawk tawh ṭhin a ni," an ti.

Congress party chuan, July 3, 2020-a thi F Lawmkima (80), Kulikawn chu kum 1993 inthlana Congress party leh Brig. T Sailo kaihhruai Mizo Janata Dal (MJD) ṭangrualin sorkarna an lâk ṭuma ṭangrual sorkara minister of state a ni tih an sawi a; an ui thu leh ram tana a hnathawhte an hriat reng tur thu an tarlang a ni.