Ambulance pek Congress-in an sawisel

Serchhip Chanmari Veng Congress Unit I & II chuan July 4, Inrinni khan thuchhuah siamin, Serchhip VII VC-in Serchhip District Hospital hnena ambulance (EECO van) an pe chu thil lawmawm leh chhuanawm tak a nih rualin, tuna Mizoram sorkara sum ni loa ṭanpuina petu turte MNF an nih leh nih loh zir chian hmasak zel a ngai tih tilangtu a nih thu an tarlang.

Serchhip Chanmari Veng Congress-te chuan, Lunglei Civil Hospital tana MLA Zodintluanga'n RT-PCR khawl a pek sorkarin a dawng duh lo tih sawiin, "A theih dan chi kima an dan hnua mipui nawrna vanga tlai khawhnua hreh em ema Lunglei damdawi-ina an lak leh tâk dan kan hria. Enkawl zuina tura driver leh thawktu dang ken tel ngah tak ve tho ambulance petute hi MNF VC an ni miau a, harsatna siam hauh loin lawm takin hospital thuneitute an dawntir mai thei a. Tun sorkara sumfai ni loa thil pe turte MNF an nih leh nih loh zir chian hmasak zel a ngai nia lang hi ṭha lo kan ti em em a ni," an ti.

Ambulance atana sum hman Rs. 6,15,376 zingah mipuiin MGNREGA sum an thawh khawm a tel ngeia an ngaih thu tarlangin, "Kan huam chhunga hna thawh tur tam tak awm, sum awm loh chhuanlama an thawh loh laia kan area páwna hma an la hi hriatthiam harsa kan ti," an ti a; VC inthlan tur thlíra vote zawnna dik takah an ngaih thu leh ambulance an lei hmain mipui an ráwn hmasa ngei tura an ngaih thu an tarlang bawk.